Գյումրին արժանի է ունենալու նորմալ քաղաքային կառավարում, և ունենալու է․ Ռուբինյան

Գյումրիում մայիսի 25-ին «Քաղաքացիական պայմանագիր» կուսակցության նախընտրական հանրահավաքը մեկնարկեց Հայաստանի Հանրապետության օրհներգով։ Բացման խոսքով հանդես եկավ կուսակցության հիմնադիր-անդամ, ՀՀ ԱԺ փոխնախագահ Ռուբեն Ռուբինյանը՝ գյումրեցիներին հիշեցնելով, որ տարիներ առաջ հենց այդ` Վարդանանց հրապարակից է ազդարարվել Թավշյա հեղափոխության մեկնարկը։ 

«8 տարի առաջ էր, որ Նիկոլ Փաշինյանն այստեղից, հենց այս հրապարակից ազդարարեց թավշյա հեղափոխության սկիզբը։ Բայց կա մի պարադոքս․ մինչ օրս քաղաքային, տեղական ինքնակառավարման իմաստով հեղափոխությունը Գյումրի այդպես էլ չի հասել։ Այսօր մենք քայլում էինք Մուշ թաղամասով, 58 թաղամասով, և փողոցները կարծես ռմբակոծված լինեին, կարծես 1946 թիվը լիներ։ Մի կողմից մենք ափսոսում ենք և մեզ մեղավոր ենք զգում, որ Գյումրին այդպես էլ հեղափոխական կառավարում չունեցավ, բայց մյուս կողմից էլ «Քաղաքացիական պայմանագիր» կուսակցությունը երբեք Գյումրիում քաղաքային կառավարում չի ստանձել, որովհետև չի ստացել համապատասխան մանդատ»,- «Արմենպրես»-ի փոխանցմամբ՝ ընդգծեց Ռուբինյանը՝ կոչ անելով, որ հունիսի 7-ի ընտրություններին Գյուրին «Քաղաքացիական պայմանագրին» տա այդ մանդատը:

Ռուբեն Ռուբինյանը նկատեց՝ Գյուրին արժանի է ունենալու նորմալ քաղաքային կառավարում, և վստահեցրեց՝ Գյուրին այդ կառավարումն ունենալու է։

«Դա անելու համար անհրաժեշտ է մեկ բան․ ընտրություններ 2026-ին քվեարկել 16-ին», - հավելեց նա։

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ 

Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։ «Քաղաքացիական պայմանագիր» կուսակցությունն ընտրություններին մասնակցում է 16 համարի ներքո՝ «Տե՛ր կանգնիր խաղաղությանը» կարգախոսով։

 «Քաղաքացիական պայմանագիր» կուսակցությունը ԿԸՀ է ներկայացրել 283 թեկնածուից կազմված ընտրական ցուցակ, ինչպես նաև ազգային փոքրամասնությունների 10 թեկնածուից բաղկացած ցուցակ։ Կուսակցության վարչապետի թեկնածուն Նիկոլ Փաշինյանն է։