2 րոպեի ընթերցում
Հոդվածը հրապարակվում է «Արմենպրես»-ի և BTA-ի միջև ստորագրված համաձայնագրի շրջանակում։
«Սոֆիայի երաժշտական շաբաթներ» փառատոնի կազմակերպիչները հայտարարել են, որ այս տարի փառատոնը կներառի միջազգային ճանաչում ունեցող կատարողների, կլինեն համաշխարհային և բուլղարական պրեմիերաներ։ Ինչպես հաղորդում է «Արմենպրես»-ը՝ վկայակոչելով Բուլղարիայի ազգային լրատվական գործակալությունը (BTA), այս մասին փառատոնի կազմակերպչական ասուլիսում հայտարարել է Բուլղարիայի մշակույթի նախարար Եվտիմ Միլոշևը։
Այս տարվա փառատոնի կենտրոնական երկրները լինելու են Հայաստանն ու Հունաստանը։
Սոֆիայի մշակույթի և զբոսաշրջության հարցերով փոխքաղաքապետ Իրինա Դակովան համոզմունք է հայտնել, որ նմանօրինակ մշակութային կամուրջները «կարևոր երկխոսություն են մեր միջազգային հարաբերությունների համար»։
Սոֆիայի ֆիլհարմոնիկ նվագախմբի դիրիժոր մաեստրո Նայդեն Տոդորովը պարզաբանել է, որ փառատոնի ծրագրի համար ավանդույթ է ներառել հեղինակավոր միջազգային երաժիշտների ելույթները։
«Այս տարի աշխարհի տարբեր ծայրերից կրկին կայցելեն ֆենոմենալ կատարողներ», - ասել է նա։
Նրա խոսքով՝ փառատոնի պատվավոր հյուրերից մեկը կլինի Բեռլինի ֆիլհարմոնիկ նվագախմբի դիրիժոր Կիրիլ Պետրենկոն։
«Սա այն համերգն է, որին մենք սպասել ենք 10 տարի»,- հավելել է մաեստրոն։
Ծրագրում ընդգրկված այլ միջազգային երաժիշտների թվում են շեփորահար Թինե Թինգ Հելսեթը, դաշնակահար Իվո Պոգորելիչը և դիրիժորներ Միշել Տաբաչնիկը և Քրիստոֆ Էշենբախը: Չինաստանի ազգային օպերան «Տուրանդոտ» օպերան կներկայացնի Մշակույթի ազգային պալատում՝ Ջակոմո Պուչինիի օպերայի պրեմիերայի 100-ամյակի կապակցությամբ: