Բոլիվիայում բախումներ են տեղի ունեցել հակակառավարական ցույցերի մասնակիցների և իրավապահների միջև

Բոլիվիայում հակակառավարական ցույցերը մեծ մասշտաբներ են ստացել և տարածվել ամբողջ երկրով: Ցուցարարների և ոստիկանների միջև բախումներ են տեղի ունեցել: «Արմենպրես»-ի փոխանցմամբ՝ այս մասին հաղորդում է Reuters գործակալությունը:

Անկարգությունները սկսվել են, երբ աշխատանքային պայմանների դեմ բողոքող հանքագործները երթով շարժվել են դեպի կառավարական պալատ՝ պահանջելով Ռոդրիգո Պասի հրաժարականը, որը վեց ամիս առաջ է ստանձնել երկրի նախագահի պաշտոնը:

Հանքագործները պահանջում են պայթուցիկ նյութերի և վառելիքի ավելի մեծ հասանելիություն, ինչպես նաև պայմանագրերի վերանայում և հանքարդյունաբերության կանոնակարգերի կիրառում:

Չնայած բողոքի ակցիայի մասնակիցների մեծամասնությունը հանքագործներ են, սակայն ցույցերին են միացել նաև ֆերմերներ և այլ ոլորտների աշխատողներ, որոնք տարբեր վայրերից սկսել են շարժվել դեպի մայրաքաղաք Լա Պաս: