2 րոպեի ընթերցում
«Դեմոկրատիա, Օրենք, Կարգապահություն» կուսակցության գլխավոր շտաբի պետ, փաստաբան Լևոն Բաղդասարյանը հայտարարել է, որ առաջիկա օրերին փուլ առ փուլ ներկայացվելու են ընտրություններից հետո իրականացվելիք ռազմավարական և ծրագրային դրույթները։ Ինչպես հաղորդում է «Արմենպրես»-ը Բաղդասարյանն այս մասին գրել է «Ֆեյսբուք»-ի իր էջում։
Գրառման մեջ նշվում է, որ կուսակցությունը նպատակ ունի կառուցել «Արևային Հայաստան»։
«Հայաստան, որտեղ օրենքը լինելու է ոչ թե իշխանավորի մահակ, այլ՝ քաղաքացու վահան։ Հայաստան, որտեղ աշխատող մարդը այլևս չի նվաստացվելու, թոշակառուն չի գոյատևելու ողորմությամբ, գյուղացին չի լքելու իր հողը, զինվորը չի լինելու մոռացված»,- ասված է հրապարակման մեջ։
Բաղդասարյանի խոսքով՝ կուսակցությունը Վարդան Ղուկասյանի առաջնորդությամբ պատրաստվում է իրականացնել «օրենքի դիկտատուրայի» վրա հիմնված քաղաքականություն։
Չնայած այն հանգամանքին, որ կուսակցության հիմնադիր Վարդան Ղուկասյանի գրանցումը ԿԸՀ-ի կողմից մերժվել է՝ վերջին տարիներին Հայաստանում մշտական բնակության և քաղաքացիության վերաբերյալ փաստաթղթերի հետ կապված խնդիրների պատճառով, քաղաքական ուժը շարունակում է մասնակցությունը ընտրություններին։
Մայիսի 8-ին մեկնարկել է հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։
Կուսակցությունը շարունակում է վարչապետի թեկնածու համարել Վարդան Ղուկասյանին։
Կուսակցությունը ԿԸՀ է ներկայացրել 93 թեկնածուից բաղկացած ընտրական ցուցակ և ընտրություններին մասնակցում է 15 համարի ներքո։