ՀՀ ԱԽ քարտուղարն ու Բելգիայի Ներկայացուցիչների պալատի նախագահը քննարկել են Հայաստան-Ադրբեջան խաղաղության գործընթացը
1 րոպեի ընթերցում
Հայաստանի Հանրապետության անվտանգության խորհրդի քարտուղար Արմեն Գրիգորյանն ընդունել է Բելգիայի Թագավորության Ներկայացուցիչների պալատի նախագահ Պետեր դը Ռուվերի գլխավորած պատվիրակությանը:
«Ողջունելով պատվիրակության այցը Հայաստան, գոհունակությամբ ընդգծել եմ Հայաստան-Բելգիա երկկողմ հարաբերությունների զարգացման դրական դինամիկան:
Մտքեր ենք փոխանակել Հայաստան-Բելգիա երկկողմ հարաբերությունների, Հայաստան-ԵՄ անդրանիկ գագաթնաժողովի ու դրա արդյունքների, ինչպես նաև Հայաստան-Ադրբեջան խաղաղության գործընթացի ու դրա արդյունքում ստեղծվող տնտեսական լայն հնարավորությունների մասին»,– «Արմենպրես»-ի փոխանցմամբ՝ հանդիպումից մանրամասներ է հայտնել ՀՀ ԱԽ քարտուղարը՝ «Ֆեյսբուք»-ի իր էջում կատարած գրառման միջոցով։
Պետեր դը Ռուվերը շնորհակալություն է հայտնել ջերմ ընդունելության համար և ընդգծել, որ ուրախ է Հայաստանի համար այս պատմական ժամանակահատվածում գտնվել Երևանում: