Էկոնոմիկայի նախարարը Ռուսաստանում «Ջերմուկ» հանքային ջրերի խմբաքանակի վաճառքն արգելելու որոշման մեջ քաղաքական ենթատեքստ չի տեսնում
2 րոպեի ընթերցում
Հայաստանի Հանրապետության էկոնոմիկայի նախարար Գևորգ Պապոյանն անդրադարձել է Ռուսաստանում «Ջերմուկ գրուպ» ընկերության հանքային ջրերի որոշակի խմբաքանակի վաճառքն արգելելու որոշմանը։
«Արմենպրես»-ի հաղորդմամբ՝ Աշխատանքի և աշխատավորների համերաշխության միջազգային օրվան նվիրված շքերթի ժամանակ լրագրողների հետ ճեպազրույցում նախարարն ասաց, որ քաղաքական ենթատեքստ կատարվածում չի տեսնում։
«Մեր երկրից դուրս եկող ապրանքի որակական չափանիշները պետք է ապահովենք։ Ես ինքս հավատացած եմ, որ «Ջերմուկ»-ը բարձր որակի է և համապատասխանում է բոլոր ստանդարտներին և բացարձակ կասկած չունեմ, որ հարցը լուծվելու է»,-ասաց նախարարը։
Ապրիլի 28-ին հայտնի էր դարձել, որ Ռուսաստանն արգելել է հայկական «Ջերմուկ» հանքային ջրերի որոշակի խմբաքանակի վաճառքը օնլայն և օֆլայն խանութներում։ Հայկական հանքային ջրերի վաճառքը դադարեցնելու համար հիմք էր հանդիսացել «Ռոսպոտրեբնադզոր»-ի նամակը, որում գերատեսչությունը նշել է «Ռուսաստանի քաղաքացիների կյանքին և առողջությանը հնարավոր վտանգը կանխելու համար հրատապ քայլեր ձեռնարկելու անհրաժեշտության մասին»։ Որպես վաճառքը դադարեցնելու պատճառ էր նշվել «պարտադիր պահանջների խախտումը»։ Արգելքի տակ են ընկել 2026 թվականի փետրվարի 17-ից մինչև 2026 թվականի մարտ արտադրված ջրերը։