2 րոպեի ընթերցում
ԱՄՆ պետքարտուղար Մարկո Ռուբիոն հայտարարել է, որ միջուկային հարցը և Իրանի՝ մերձավորարևելյան տարածաշրջանում իր ազդեցությունն ընդլայնելու ձգտումն այն հիմնական խնդիրներն են, որոնք անհանգստացնում են Վաշինգտոնին: «Արմենպրես»-ի փոխանցմամբ՝ այս մասին նա հայտնել է Fox News-ի հետ հարցազրույցում:
«Նախ և առաջ, միջուկային հարցն է պատճառը, որ մենք զբաղվում ենք այս ամենով։ Եթե Իրանը պարզապես արմատական երկիր լիներ, որը կառավարվում է արմատական հայացքներ ունեցող մարդկանց կողմից, այն, միևնույն է, խնդիր կլիներ…. Ըստ էության, նրանք ձգտում են ընդլայնել և արտահանել իրենց հեղափոխությունը: Ահա թե ինչու են նրանք «Հեզբոլլահ»-ի հետ Լիբանանում, ահա թե ինչու են նրանք աջակցում ՀԱՄԱՍ-ին, ահա թե ինչու են նրանք աջակցում աշխարհազորայիններին Իրաքում։ Նրանք գերիշխանության են ձգտում ոչ միայն Իրանի նկատմամբ, այլև՝ տարածաշրջանի նկատմամբ…. Պատկերացրեք, եթե այդ նույն մարդկանց համար հասանելի լիներ միջուկային զենքը։ Նրանք ամբողջ տարածաշրջանը պատանդ կպահեին», - հայտարարել է Ռուբիոն։
Պետքարտուղարության ղեկավարի խոսքով՝ Իրանը զրկվել է հրթիռների կեսից, նավատորմից, ավիացիայից, ուստի երկիրը գտնվում է թույլ վիճակում։
Պատասխանելով Իրանի հետ համաձայնության չհասնելու դեպքում ԱՄՆ-ի կողմից ձեռնարկվող միջոցների վերաբերյալ լրագրողի հարցին՝ Ռուբիոն հայտարարել է, որ հիմնական միջոցը լինելու է Թեհրանի վրա ճնշման ուժեղացումը։
Ռուբիոն նաև հայտարարել է, որ ըստ ԱՄՆ-ի՝ Իրանի նոր գերագույն առաջնորդ Մոջթաբա Խամենեին ողջ է, բայց կան կասկածներ՝ «արդյոք նա վայելում է նույն վստահությունը, ինչ նրա հայրը»։
«Մենք չգիտենք այդ հարցերի պատասխանները, բայց ես որոշակիորեն կարծում եմ, որ նրանց համակարգում ինչ-որ բան այն չէ, ինչը դժվարացնում է նրանց հետ հիմա բանակցություններ վարելը», - հավելել է դիվանագետը։