1 րոպեի ընթերցում
Կոտայքի մարզի Աբովյան խոշորացված համայնքի Մայակովսկի գյուղի ճանապարհը, որը Գետառի հունից դուրս գալու արդյունքում դժվարանցանելի էր, արդեն բաց է։
«Արմենպրես»-ի թղթակցի հետ զրույցում համայնքի վարչական ղեկավար Վահագն Բարսեղյանն ասաց, որ մաքրման աշխատանքների արդյունքում իրենց հաջողվել է խնդրին որոշակի լուծում տալ։
«Տեղ կար, որտեղ ջուրն արդեն դուրս էր եկել դեպի ճանապարհ։ Երեկ այդ մասը փակել ենք։ Ահագին մաքրվել է՝ մի 300-400 մետր, հիմա ջուրը նորմալ հոսում է։ Բաց տեղերում պանելներ են դրվում, որ ջուրը նորից ճանապարհ դուրս չգա»,-ասաց նա:
Բարսեղյանը վստահեցրեց, որ Մայակովսկի համայնքի բնակիչները լուրջ վնասներ չեն կրել։
«Մի քանի տեղ գյուղատնտեսական հողերին է վնաս տվել, բայց բնակիչների տները չի լցվել»,-նշեց համայնքի վարչական ղեկավարը՝ հավելելով, որ վնասների գնահատում դեռ չեն կարողանում անել։
Բարսեղյանն ասաց նաև, որ խնդիրը միշտ էլ կա և պատճառը աղբն ու տիղմն է։
«Մենք ամեն տարի միշտ մաքրել ենք, ուղղակի այս տարի անձրևները, ձնհալը գումարվել են։ Հիմա համայնքում նորմալ վիճակ է, բայց երեկոյան կողմ ձնհալներով պայմանավորված հնարավոր է ջրի հոսքը նորից ուժեղանա»,-հավելեց Բարսեղյանը։