2 րոպեի ընթերցում
Սաուդյան Արաբիայի թագաժառանգ Մուհամմադ բին Սալմանը և Պակիստանի վարչապետ Շեհբազ Շարիֆը Ջիդդայում կայացած հանդիպման ժամանակ քննարկել են տարածաշրջանային և միջազգային հարցեր։ «Արմենպրես»-ի փոխանցմամբ՝ այս մասին հաղորդում է Սաուդյան մամուլի գործակալությունը (SPA)։
Հրապարակման համաձայն՝ քննարկումների ընթացքում կողմերը նաև անդրադարձել են ԱՄՆ-ի և Իրանի միջև ընթացող բանակցություններին, որոնք վերջերս հյուրընկալվել էին Պակիստանում։
Նաև նշվում է, որ Սաուդյան Արաբիայի թագաժառանգն ընդգծել է տարածաշրջանային կայունությունը վերականգնելու համար դիվանագիտական ջանքերը շարունակելու կարևորությունը՝ մասնավորապես բարձր գնահատելով վարչապետ Շարիֆի և Պակիստանի բանակի հրամանատար, գեներալ Ասիմ Մունիրի դերը դիվանագիտական գործընթացի խթանման գործում։
Ավելի վաղ հաղորդվել էր, որ Պակիստանի վարչապետ Շեհբազ Շարիֆը չորսօրյա այցով կմեկնի Սաուդյան Արաբիա, Կատար և Թուրքիա՝ ԱՄՆ-Իրան խաղաղության շուրջ բանակցությունների հնարավոր երկրորդ փուլից առաջ։
Պակիստանն ակտիվորեն հանդես է գալիս որպես միջնորդ Իրանի և ԱՄՆ-ի միջև՝ նպատակ ունենալով նպաստել երկկողմ բանակցություններին։
Պակիստանի միջնորդությամբ ապրիլի 11-12-ին Իսլամաբադում տեղի են ունեցել ԱՄՆ-ի և Իրանի պատվիրակությունների միջև բանակցություններ։ Առաջիկայում չի բացառվում բանակցությունների շարունակությունն Իսլամաբադում։