1 րոպեի ընթերցում
Ամերիկյան ռազմածովային ուժերն Արաբական ծովում ունեն խմբավորում՝ բաղկացած 14 ռազմանավից, որոնք կարող են օգտագործվել Հորմուզի նեղուցի շրջափակման համար: «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը՝ վկայակոչելով ԱՄՆ ռազմածովային ինստիտուտի տվյալները։
Տարածաշրջանում տեղակայված է ինը հրթիռային էսկադրային ականակիր, ափամերձ գոտու մեկ մարտական նավ, երեք մեծ դեսանտային նավ և «Աբրահամ Լինքոլն» ավիակիրը։
Ինչպես հաղորդել է BBC-ն, վկայակոչելով եվրոպական արբանյակային լուսանկարները, ԱՄՆ ռազմածովային ուժերի «Աբրահամ Լինքոլն» ավիակիրը և երկու հրթիռային էսկադրային ականակիր մտել են Օմանի ծոց և տեղակայվել Հորմուզի նեղուցից դեպի արևելք։ Սա ամենամոտն է Պարսից ծոցի այն շրջանին, որտեղ Իրանի դեմ ռազմական գործողության սկսվելուց ի վեր առաջին անգամ մտել է ամերիկյան ավիակիրը, նշում է BBC-ն։
ԱՄՆ զինված ուժերը հայտարարել էր, որ ապրիլի 13-ին սկսում է Հորմուզի նեղուցի շրջափակումը: Ամերիկյան ուժերը չեն խոչընդոտի ազատ նավագնացությունն այն լցանավերի համար, որոնք նեղուցով ընթանում են ոչ իրանական նավահանգիստներ, սակայն թույլ չեն տա իրանական նավահանգիստներից դուրս եկած կամ այնտեղ ուղևորվող նավերի անցումը։