2 րոպեի ընթերցում
Հայաստանի սահմանամերձ և գյուղական այլ բնակավայրերում տների կառուցման պետական աջակցության ծրագիրը, որի շրջանակներում Կառավարության կողմից հաստատված բնակավայրերում տուն կառուցելու համար քաղաքացիներին տրամադրվում է 16 միլիոն դրամի աջակցություն, կլինի շարունակական։
«Արմենպրես»-ի փոխանցմամբ՝ այս մասին «Ֆեյսբուք»-ի իր էջում հրապարակած տեսանյութում հայտարարել է ՀՀ աշխատանքի և սոցիալական հարցերի նախարար Արսեն Թորոսյանը։
Նախարարը նշել է, որ իշխող «Քաղաքացիական պայմանագիր» կուսակցության նախընտրական ծրագրի 95-րդ կետում նշել են սահմանամերձ և այլ գյուղական բնակավայրերում 3000 նոր տուն կառուցման մասին։
«Խոսքն արդեն հայտնի 16 միլիոնների ծրագրի մասին է։ Դուք գիտեք, որ մենք վերջերս այն վերսկսեցինք՝ տալով մոտ 1400 տուն կառուցելու հնարավորություն, բայց մենք մեր նախընտրական ծրագրում ֆիքսել ենք առնվազն 3000-ը, այսինքն՝ ծրագիրը լինելու է շարունակական, հետագայում նույնպես կլինեն հնարավորություններ այլ բնակավայրերում, միգուցե, նույն բնակավայրերում տներ կառուցելու։
Մենք, հետևելով այս ծրագրի ընթացքին, արդեն որոշումներ կկայացնենք, ու սա ընդհանրապես համարում ենք մեր ամենալայնածավալ բնակարանաշինական ծրագրերից մեկը, որը փոխում է թե՛ կոնկրետ մարդկանց կյանքը, թե՛ մեր համայնքների պատկերը։