1 րոպեի ընթերցում
Հայաստանի ծանրամարտի տղամարդկանց թիմի գլխավոր մարզիչ Հակոբ Փիլոսյանի կարծիքով` տղամարդկանց ընտրանին Եվրոպայի առաջնության մեդալներից անմասն չի մնա:
«Թիմի վիճակը շատ լավ է, վնասվածքներ չունենք: Անցկացրել ենք 5 ուսումնամարզական հավաք: Տղաները պատրաստ են, լավ տրամադրված են: Իհարկե, մեկնելու ենք մեդալների համար»,-«Արմենպրես»-ի հաղորդմամբ` լրագրողների հետ զրույցում ասաց մասնագետը:
Հայաստանի ծանրամարտի տղամարդկանց թիմի անդամ Ռաֆիկ Հարությունյանը ևս մեծ ակնկալիքներ ունի առաջիկա Եվրոպայի առաջնությունից:
«Մարզավիճակի առումով սա վերջին փուլն է, որն անցնում ենք: Մենք ամբողջությամբ պատրաստ ենք մրցումներին: Մրցաշարի մեկնում ենք մարտական տրամադրությամբ: Ես ինձ ավելի լավ զգում եմ մրցահարթակին: Փորձելու եմ մրցումներին ավելի բարելավել կիլոգրամներս: Թիմում լարվածություն չկա, քանի որ մեծամասնությունը փորձառու մարզիկներ են»,-ասաց Հարությունյանը:
Ծանրամարտի Եվրոպայի առաջնությունը կկայանա ապրիլի 19-26-ը Վրաստանի Բաթումի քաղաքում: