ԱՄԷ-ում խոշորագույն բանկերն անցել են աշխատանքի հեռավար ռեժիմի, HSBC-ն փակել է մասնաճյուղերը Կատարում
1 րոպեի ընթերցում
Իրանի կողմից Մերձավոր Արևելքում բանկային ու ֆինանսական սեկտորին հարվածներ հասցնելու մասին հայտարարությունից հետո տարբեր խոշոր բանկեր սկսել են փակել տարածաշրջանում իրենց մասնաճյուղերը։
Ինչպես հաղորդում է «Արմենպրես»-ը՝ վկայակոչելով Reuters-ը, ամերիկյան ֆինանսական հսկաներից մեկը համարվող Citigroup-ն աշխատակիցներին հորդորել է լքել գրասենյակները Դուբայի Միջազգային ֆինանսական կենտրոնում և քաղաքի այլ թաղամասում։ Ընկերությունից աշխատակիցներին հորդորել են մինչև հաջորդ ծանուցումն աշխատել տանից։
Նման ծանուցում իր աշխատակիցներին ուղարկել է նաև բրիտանական ֆինանսական հսկան՝ Standard Chartered-ը։
HSBC-ն փակել է բոլոր մասնաճյուղերը Կատարում։
Այս քայլերը ձեռնարկվել են այն բանից հետո, երբ Թեհրանի «Խաթամ ալ-Անբիա» ռազմական հրամանատարության խոսնակը իրանական բանկի վրա հարձակումից հետո մարտի 11-ին հայտարարեց, որ Իրանը թիրախավորելու է տարածաշրջանում ԱՄՆ-ի և Իսրայելի հետ կապված բանկերն ու ֆինանսական հաստատությունները։
Իրանական «Մեհր» լրատվական գործակալությունը հաղորդել է, որ ամերիկա-իսրայելական ուժերի կողմից Թեհրանում հարված է հասցվել Իրանի խոշորագույն բանկերից մեկի՝ «Սեփահ» բանկի հետ կապված վարչական շենքին։