2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ շուտով պարզ կդառնա, թե ով է վերահսկելու Իրանը։ «Արմենպրես»-ի փոխանցմամբ՝ այս մասին նա ասել է NewsNation հեռուստաալիքի հետ հարցազրույցում։
«Դուք շատ շուտով դա կիմանաք», - ասել է Թրամփը՝ պատասխանելով համապատասխան հարցին։
ԱՄՆ նախագահի խոսքով՝ Իրանում ցամաքային գործողության անհրաժեշտություն, ամենայն հավանականությամբ, չի լինի։
«Մենք շատ մեծ ծավալի վնաս ենք հասցնում։ Մենք նրանց հսկայական վնաս ենք հասցնում», - ընդգծել է Թրամփը։
Նա հավելել է, որ չի մտահոգվում ամերիկյան օբյեկտների կամ տարածքի վրա հնարավոր հարձակումներով. «դա պատերազմի մի մասն է. դա դուր գա մարդկանց, թե ոչ, դա այդպես է»։
Թրամփը, խոսելով Իրանում ռազմական գործողության նպատակներին հասնելու մասին, նշել է, որ դա ժամանակի հարց է։ «Ես շատ բան գիտեմ, և ես անպայման կիմանամ, թե երբ դրանց կհասնենք։ Եվ դա արդեն շատ մոտ է», - ասել է Սպիտակ տան ղեկավարը։
Ավելի վաղ NewsNation-ի լրագրողը հայտնել էր, որ Թրամփն ասել է, որ ԱՄՆ-ն կարձագանքի Էր Ռիադում ամերիկյան դեսպանատան վրա իրանական անօդաչու թռչող սարքերի գրոհներին և Իրանի դեմ գործողության ընթացքում վեց ամերիկացի զինծառայողների զոհվելուն։
Իսրայելը և ԱՄՆ-ն փետրվարի 28-ից հարվածներ են հասցնում Իրանին, որն էլ պատասխան հարվածներ է հասցնում Իսրայելին և տարածաշրջանի երկրներում գտնվող ամերիկյան ռազմաբազաներին և էներգետիկ օբյեկտներին։