Հրաձգության Եվրոպայի առաջնության կազմակերպումը ցույց է տալիս, որ հաջողել ենք. Ժաննա Անդրեասյան
2 րոպեի ընթերցում
Հայաստանի Հանրապետության կրթության, գիտության, մշակույթի ու սպորտի նախարար Ժաննա Անդրեասյանը Երևանում ընթացող հրաձգության Եվրոպայի առաջնությունը հաջողված է համարում:
«Իսկապես պատմական իրադարձություն է, որովհետև առաջին անգամն է, որ հյուրընկալում ենք հրաձգության Եվրոպայի առաջնությունը և, իհարկե, վերջին տարիներին բավական փորձ էինք կուտակել աշխարհի, Եվրոպայի առաջնություններ կազմակերպելու առումով: Սա մեր շարունակական քաղաքականությունն է, բայց պետք է ասեմ, որ հրաձգությունը բազմաթիվ առանձնահատկություններ ուներ, և այդ իմաստով շատ կարևոր փորձ եմ համարում»,- «Արմենպրես»-ի հաղորդմամբ` լրագրողների հետ զրույցում ասաց Անդրեասյանը:
Ըստ նախարարի, առաջնության կազմակերպումը լավ հնարավորություն է ներքին ընթացակարգերը վերլուծելու, դրանք հրաձգության տեսանկյունից ավելի բարելավելու համար:
«Հայաստանն ամրապնդում է իր դիրքը սպորտային քարտեզում: Կարծում եմ` հրաձգության Եվրոպայի առաջնության կազմակերպումը և դրա արձագանքը ցույց է տալիս, որ հաջողել ենք։ Մինչ այս պահը լսում եմ միայն դրական կարծիքներ, կազմակերպման որակի, տեխնիկական հարցերի բոլոր բաղադրիչների առումով և սա նշանակում է, որ կարող ենք առաջ գնալ: Մեր ֆեդերացիայի համար այս առաջնությունը լավ փորձառություն է»,-առանձնացրեց նախարարը:
Ավելի վաղ Հայաստանի հրաձգության ֆեդերացիան հատուկ պարգևի է արժանացել հրաձգության համաշխարհային կառույցի կողմից: Հրաձգության համաշխարհային ֆեդերացիայի նախագահ Լուչիանո Ռոսսին հատուկ պատվոգրով է պարգևատրել Հայաստանի հրաձգության ֆեդերացիայի նախագահ Արթուր Հովհաննիսյանին ու ֆեդերացիայի գլխավոր քարտուղար Արեգ Սարիբեկյանին` Երևանում ընթացող հրաձգության Եվրոպայի առաջնության անցկացման համար: