Կանադան և Հնդկաստանը հայտարարել են հարաբերությունների զարգացման նոր փուլի մասին

Կանադայի վարչապետ Մարկ Քարնին և Հնդկաստանի վարչապետ Նարենդրա Մոդին մարտի 2-ին հանդիպում են անցկացրել Դելիում, որի ընթացքում քննարկվել են Հնդկաստան-Կանադա ռազմավարական գործընկերությունը և առևտրի և ներդրումների ոլորտում համագործակցությունը խորացնելու ուղիները։ «Արմենպրես»-ի փոխանցմամբ՝ այս մասին հաղորդում է BBC-ն։

Հանդիպումից հետո առաջնորդները հանդես են եկել համատեղ մամուլի ասուլիսով, որտեղ Մոդին հայտարարել է, որ բարձր է գնահատում Քարնիի այցը Հնդկաստան և Հնդկաստան-Կանադա գործընկերության մակարդակի բարձրացումը։

«Մենք նաև քննարկել ենք մինչև 2030 թվականն առևտրի ծավալը մինչև 50 միլիարդ դոլարի հասցնելու և Համապարփակ տնտեսական գործընկերությունն արագ ավարտին հասցնելու հարցը», - հայտարարել է Մոդին։

Նա ընդգծել է, որ Հնդկաստանը և Կանադան բնական գործընկերներ են տեխնոլոգիաների և նորարարության ոլորտում։

Անդրադառնալով Կանադայի ներդրմանը Արհեստական ​​բանականության գագաթնաժողովում՝ Մոդին շնորհակալություն է հայտնել Քարնիին միջոցառման հաջողությանը նպաստելու համար։

Նա նշել է, որ երկու երկրները կհամակարգեն համագործակցությունը տիեզերքի, տեխնոլոգիաների և կարևորագույն հանքանյութերի ոլորտներում։

Մոդին ընդգծել է շրջակա միջավայրի պաշտպանության կարևորությունը երկկողմ գործընկերության մեջ։

Քարնին իր այցն անվանել է Հնդկաստան-Կանադա հարաբերություններում գործընկերության նոր դարաշրջան։

Նա նշել է, որ երկու երկրները սկսում են ռազմավարական էներգետիկ գործընկերություն՝ նաև հիշատակելով համագործակցությունը կարևորագույն հանքանյութերի և մաքուր էներգիայի ոլորտներում:

«Մենք առաջ ենք շարժվում Կանադա-Հնդկաստան տնտեսական գործընկերության համաձայնագրի ուղղությամբ՝ նպատակ ունենալով այն կնքել մինչև այս տարվա վերջ», - հայտնել է Քարնին։

Նրա խոսքով՝ կանադական Cameco ընկերությունը երկարաժամկետ պայմանագիր է կնքել Հնդկաստանին ուրան մատակարարելու համար։

Քարնին նաև հայտարարել է մի շարք համաձայնագրերի մասին՝ ուղղված կրթական և մշակութային կապերը ամրապնդելուն, այդ թվում՝ բարձրագույն կրթության ոլորտում։

Կանադայի և Հնդկաստանի միջև հարաբերությունները սրվել էին մի քանի տարի առաջ՝ այն բանից հետո, երբ այն ժամանակվա վարչապետ Ջասթին Թրյուդոն Հնդկաստանի կառավարությանը մեղադրել էր Կանադայի քաղաքացու սպանության հետ առնչության համար: 2023 թ. հունիսին Կանադայի Բրիտանական Կոլումբիայի նահանգում սպանված Հարդիփ Սինգհ Նիջարը նաև հայտնի սիկհ անջատողական էր։ Հնդկաստանը բազմիցս հերքել է իր առնչությունը Նիջարի սպանությանը։

2025 թվականին վարչապետի պաշտոնը ստանձնելուց ի վեր Քարնին սկսել է հարաբերությունների կարգավորումը Նյու Դելիի հետ՝ վերականգնելով դիվանագիտական ​​ուղիները։