2 րոպեի ընթերցում
Իրանի Իսլամական Հանրապետության արտաքին գործերի նախարար Աբբաս Արաղչին հեռախոսազրույց է անցկացրել Իրաքի ԱԳ նախարար Ֆուադ Հուսեյնի հետ։
«Արմենպրես»-ի հաղորդմամբ՝ այս մասին հայտնում է իրանական IRIB-ը՝ ներկայացնելով հեռախոսազրույցի մանրամասները։
Նշվում է, որ զրուցակիցներն անդրադարձ են կատարել տարածաշրջանային և միջազգային հարցերի։
Հաղորդվում է, որ զրույցի ընթացքում Իրանի ԱԳ նախարարն իր իրաքցի գործընկերոջն է ներկայացրել իրանա-ամերիկյան միջուկային բանակցությունների ընթացքը։
Զրույցի ընթացքում ընդգծվել է տարածաշրջանում խաղաղությունն ու կայունությունը պահպանելու համար տարածաշրջանային երկրների միջև սերտ խորհրդակցությունների շարունակականության կարևորությունը։
Ավելի վաղ Աբբաս Արաղչին հայտնել էր, որ Իրանի և Միացյալ Նահանգների միջև Ժնևում կայացած անուղղակի բանակցությունների երրորդ փուլը մինչ օրս ամենաինտենսիվն էր, քննարկումներում առաջընթաց է գրանցվել։
ԱՄՆ-ի և Իրանի միջև անուղղակի բանակցությունների երրորդ փուլը տեղի է ունեցել Ժնևում փետրվարի 26-ին։ Ավելի վաղ կողմերը մեկ հանդիպում անցկացրել էին Օմանում, ևս մեկը՝ կրկին Ժնևում։
Բանակցություններում Իրանի պատվիրակությունը գլխավորում է արտաքին գործերի նախարար Աբբաս Արաղչին, իսկ ԱՄՆ պատվիրակությունը՝ ԱՄՆ նախագահի հատուկ բանագնաց Սթիվ Ուիթքոֆը։