Նախարարի համոզմամբ՝ մոդուլյար ատոմակայանը լրացուցիչ ճկունություն կհաղորդի ՀՀ էներգահամակարգի կառավարմանը
1 րոպեի ընթերցում
ՀՀ տարածքային կառավարման և ենթակառուցվածքների նախարար Դավիթ Խուդաթյանի համոզմամբ՝ մոդուլային ատոմակայանը Հայաստանի էներգահամակարգի կառավարմանը լրացուցիչ ճկունություն կհաղորդի։
«Արմենպրես»-ի հաղորդմամբ՝ այս մասին Դավիթ Խուդաթյանը նշեց լրագրողների հետ ճեպազրույցում՝ Քաղաքացիական պայմանագիր կուսակցության կենտրոնական գրասենյակում համամասնական ցուցակի ձևավորման ընտրությանը մասնակցելուց հետո։
«Նախորդ տարվա ընթացքում արևային կայանների ծավալների ավելացումը բերել է նրան, որ մենք շատ հաճախ մեր հիմնական հզորությունները, ներառյալ՝ Մեծամորի ատոմակայանը, ստիպված ենք եղել արտադրական ծավալից էական նվազ չափով պահել էներգահամակարգում։ Մոդուլային ատոմակայանը մեզ հնարավորություն է տալիս շատ ավելի ճկուն լինել կառավարման պրոցեսում, ինչը և անվտանգային հարց է մեզ համար, և էներգահամակարգում կայունություն ապահովելու։ Հենց այդ է ընկած մոդուլային ատոմակայան ընտրելու հիմքում»,-պարզաբանեց Խուդաթյանը։
Նրա խոսքով՝ անցած տարի հստակեցվել է, որ Հայաստանին անհրաժեշտ է մոդուլային ատոմակայան, իսկ մոդելի վերաբերյալ տարբեր երկրներից, այդ թվում՝ ԱՄՆ-ից, Ռուսաստանից, Չինաստանից, Ֆրանսիայից և այլն, առաջարկները շարունակում են ուսումնասիրվել։