2 րոպեի ընթերցում
Հայաստանի վարչապետ Նիկոլ Փաշինյանն ու Ամերիկայի Միացյալ Նահանգների փոխնախագահ Ջեյ Դի Վենսը քննարկել են Հայաստանում ինստիտուցիոնալ բարեփոխումներն ու այդ ուղղությամբ Միացյալ Նահանգների կողմից ցուցաբերված երկարամյա աջակցության շարունակականությունը։ «Արմենպրես»-ի փոխանցմամբ՝ այս մասին Փաշինյանը հայտարարեց Վենսի հետ առանձնազրույցից հետո:
«Կարևորել եմ նաև «Խաղաղության խաչմերուկ» ծրագրի կարողությունների զարգացման նպատակով Հայաստանին ցուցաբերվող աջակցությունը։ Երկուստեք ընդգծել ենք, որ Հայաստանի և Միացյալ Նահանգների հարաբերություններն այսօր առավել ամուր են, քան երբևէ և պատրաստակամություն ենք հայտնել էլ ավելի զարգացնել դրանք՝ ի շահ մեր ժողովուրդների»,- ասաց Փաշինյանը։
Հայաստանի վարչապետ Նիկոլ Փաշինյանը ողջունեց ԱՄՆ փոխնախագահի և նրա ընտանիքի այցը Հայաստան և շնորհակալություն հայտնեց ՀՀ-ԱՄՆ կուռ կապերն էլ ավելի զարգացնելու Վենսի պատրաստակամության և անձնական ներդրման համար։
ԱՄՆ փոխնախագահ Ջեյ Դի Վենսը պաշտոնական այցով Հայաստան է ժամանել փետրվարի 9-ին։ ԱՄՆ փոխնախագահը Հայաստան է ժամանել կնոջ և երեխաների հետ։ Այցի շրջանակում տեղի է ունեցել Հայաստանի վարչապետ Նիկոլ Փաշինյանի և ԱՄՆ փոխնախագահ Ջեյ Դի Վենսի առանձնազրույցը։