2 րոպեի ընթերցում
Իրանի նախագահ Մասուդ Փեզեշքիանը մեկնաբանել է ուրբաթ օրը Օմանում Իրանի և ԱՄՆ-ի միջև տեղի ունեցած անուղղակի միջուկային բանակցությունները՝ դրանք որակելով որպես «քայլ առաջ»։
«Արմենպրես»-ի փոխանցմամբ՝ Իրանի նախագահը X-ի իր միկրոբլոգում կատարած գրառման մեջ ընդգծել է, որ դիվանագիտությունը մնում է Թեհրանի հիմնական ռազմավարությունը՝ վեճերը խաղաղ ճանապարհով լուծելու համար։ Նա ընդգծել է, որ Իրանի միջուկային քաղաքականությունը ղեկավարվում է միջազգային իրավունքով և «Միջուկային զենքի չտարածման մասին» պայմանագրում ամրագրված իրավունքներով։
«Իրան-ԱՄՆ բանակցությունները, որոնք տեղի են ունեցել տարածաշրջանի բարեկամ կառավարությունների աջակցությամբ, քայլ առաջ էին։ Երկխոսությունը միշտ եղել է մեր ռազմավարությունը։ Մեր տրամաբանությունը միջուկային հարցերում «Միջուկային զենքի չտարածման մասին» պայմանագրում ամրագրված իրավունքներն են»,- գրել է Իրանի նախագահը։
Նա հավելել է, որ իրանական ազգը միշտ հարգանքով է փոխադարձել հարգանքին, բայց չի հանդուրժում հարկադրանքը՝ շեշտելով, որ Իրանը բանակցություններին մասնակցում է սկզբունքային և օրինական դիրքերից։
Թեհրանը և Վաշինգտոնը ուրբաթ օրը վերսկսել են միջուկային բանակցությունները Օմանում։ Իրանի արտաքին գործերի նախարար Աբբաս Արաղչին, որը գլխավորում էր Իրանի պատվիրակությունը ԱՄՆ-ի հետ միջուկային բանակցություններում, ասել է, որ բանակցությունները լավ սկիզբ են՝ հավելելով, որ դրանց շարունակությունը կախված է մայրաքաղաքներում կայանալիք խորհրդակցություններից։
Իրանի ԱԳ նախարարը նաև հայտարարել է, որ Օմանում կայացած բանակցություններ իարդյունքների վերաբերյալ պաշտոնական Թեհրանը տեղեկացրել է Մոսկվային և Պեկինին։
Մեկնաբանելով բանակցությունները՝ ԱՄՆ նախագահ Դոնալդ Թրամփն ասել է, որ Միացյալ Նահանգները «շատ լավ բանակցություններ» է ունեցել Իրանի հետ, և Թեհրանն ու Վաշինգտոնը բանակցությունների երկրորդ փուլը կանցկացնեն հաջորդ շաբաթ։