3 րոպեի ընթերցում
ԿԳՄՍ նախարար Ժաննա Անդրեասյանի գլխավորությամբ այսօր տեղի է ունեցել 2026 թվականին Հայաստանում նախատեսված խոշոր միջազգային մարզական մրցաշարերի կազմակերպման և անցկացման միջգերատեսչական հանձնաժողովի հերթական նիստը. քննարկվել են հրաձգության Եվրոպայի առաջնության կազմակերպմանն ու անցկացմանը վերաբերող հիմնական հարցերը։
«Արմենպրես»-ի հաղորդմամբ` այս մասին հայտնում են ԿԳՄՍՆ-ից:
Նիստին մասնակցել են ԿԳՄՍ նախարարի տեղակալ Հասմիկ Ավագյանը, նախարարության գլխավոր քարտուղար Հասմիկ Հակոբյանը, Հայաստանի հրաձգության ֆեդերացիայի գլխավոր քարտուղար Արեգ Սարիբեկյանը, ինչպես նաև պետական և մարզական մի շարք կառույցների ներկայացուցիչներ։
Սպորտային հրաձգության Եվրոպայի մեծահասակների առաջնությունը կանցկացվի փետրվարի 27-ից մարտի 5-ը Կ. Դեմիրճյանի անվան մարզահամերգային համալիրում։ Արդեն իսկ մրցաշարին մասնակցության հայտ են ներկայացրել ավելի քան 40 երկրի շուրջ 400 մարզիկ և մարզիչ։ Վերջնական հայտացուցակը կհաստատվի առաջիկա օրերին։ Առաջնության շրջանակում կխաղարկվի մեդալների 70 հավաքածու։
ԿԳՄՍ նախարար Ժաննա Անդրեասյանը նշել է, որ թեև Կառավարությունը վերջին տարիներին կուտակել է միջազգային խոշոր մարզական մրցաշարերի կազմակերպման զգալի փորձ, այդուհանդերձ, անհրաժեշտ է առանձնահատուկ ուշադրություն դարձնել հրաձգություն մարզաձևի առանձնահատկություններին։ Նախարարը կարևորել է բոլոր ներգրավված կառույցների համատեղ և համակարգված աշխատանքը մրցաշարի անխափան ընթացքի և անվտանգային հարցերի ապահովման նպատակով։
Նիստի ընթացքում քննարկվել են առաջնության անցկացման համար մարզագույքի ներկրմանը, Կ. Դեմիրճյանի անվան մարզահամերգային համալիրի համապատասխան կահավորմանը և անհրաժեշտ ենթակառուցվածքների ապահովմանը վերաբերող հարցերը։ Անդրադարձ է կատարվել նաև առաջնության տարբերանշանի ընտրությանը, կամավորների ներգրավմանը, քաղաքի կենտրոնական հատվածներում երկրպագուների համար ֆան-գոտիների ստեղծմանը, հետհաշվարկի ժամացույցի տեղադրմանը, մրցումների հեռարձակման ապահովմանը, ինչպես նաև տոմսերի վաճառքի կազմակերպմանը։
Ամփոփելով նիստը՝ նախարար Ժաննա Անդրեասյանը շնորհակալություն է հայտնել գործընկեր կառույցներին արդյունավետ և համագործակցային աշխատանքի համար՝ ընդգծելով, որ նման մասշտաբային մրցաշարերի հաջող կազմակերպման հարցում միջգերատեսչական համատեղ ջանքերի ներդրումն ու ժամկետների պահպանումը կարևոր են։
Միջգերատեսչական հանձնաժողովում ընդգրկված են Ներքին գործերի և Առողջապահության նախարարությունների, Քաղաքացիական ավիացիայի կոմիտեի, Երևանի քաղաքապետարանի, Հանրային հեռուստաընկերության, ինչպես նաև մի շարք այլ կառույցների ներկայացուցիչներ։