2 րոպեի ընթերցում
Նորվեգիայի խորհրդարանը քվեարկել է միապետությունը որպես կառավարման ձև պահպանելու օգտին՝ գահաժառանգ արքայադուստր Մետե Մարիտի շուրջ սկանդալի ֆոնին: «Արմենպրես»-ի փոխանցմամբ՝ այս մասին հաղորդել է նորվեգական NRK հեռուստառադիոընկերությունը։
Նշվում է, որ կառավարման ներկայիս ձևը պահպանելու օգտին տրվել է 141 ձայն, հանրապետության հաստատման օգտին՝ 26 ձայն։
Ավելի վաղ նորվեգական VG թերթը հաղորդել էր, որ ԱՄՆ արդարադատության նախարարության կողմից սեռական հանցագործ Ջեֆրի Էփշտեյնի գործի վերաբերյալ հրապարակված նոր փաստաթղթերում Մետե Մարիտը հիշատակվում է ավելի քան հազար անգամ։ Նորվեգական NRK հեռուստառադիոընկերությունը, վկայակոչելով ստացված էլեկտրոնային նամակները, իր հերթին հաղորդել է, որ Էփշտեյնը գահաժառանգ արքայադուստր Մետե Մարիտին երկու անգամ հրավիրել է իր մասնավոր կղզի, սակայն պարզ չէ՝ արդյոք արքայադուստրն այցելել է այնտեղ։
Իր հերթին Dagbladet թերթը հաղորդել է, որ Օսլոյի շրջանային դատարանը Նորվեգիայի գահաժառանգ արքայադստեր ավագ որդուն՝ Մարիուս Բորգ Հյոյբիին մինչև մարտի 2-ը՝ չորս շաբաթ ժամկետով դատապարտել է նախնական կալանքի՝ նոր մեղադրանքներով ձերբակալության և նրա գործով դատավարության ֆոնին։
2024 թ. օգոստոսին Հյոյբին, որը մեղադրվում է մարմնական վնասվածքներ հասցնելու և կարողությունը վատնելու համար, ընդունել է իր մեղքը և հայտարարել, որ դա արել է ալկոհոլի և թմրանյութերի ազդեցության տակ։ Հոկտեմբերին նրան մեղադրանքներ են առաջադրվել երկու նախկին ընկերուհիների նկատմամբ կոպիտ վերաբերմունքի, ինչպես նաև անունը չհայտնած տղամարդու հասցեին սպառնալից հաղորդագրություն գրելու համար։ Նոյեմբերին Հյոյբին ձերբակալվել է բռնաբարության կասկածանքով։