2 րոպեի ընթերցում
Սևանա լճի մակարդակը հունվարի 26-ի դրությամբ 1900.23 մետր է:
«Արմենպրես»-ի հաղորդմամբ՝ այս մասին 2025-ի ամփոփիչ ասուլիսում հայտնեց Շրջակա միջավայրի նախարար Համբարձում Մաթևոսյանը:
«Այսօրվա դրությամբ լճի մակարդակը կազմում է 1900.23 մ: Արփա-Սևան ջրատարով լիճ է տեղափոխվել 120 մլն խմ ջուր՝ 2024-ի համեմատ 64 մլն խմ-ով պակաս»,-ասաց Մաթևոսյանը:
Շարունակվում են լճի մոնիթորինգի տվյալների ճշգրտման աշխատանքները: Առափնյա գոտում տեղադրվել է 1 ավտոմատ օդերևութաբանական կայան, արդիականացվել են ավազանի 2 հիդրոլոգիական դիտակետերը:
Կենսապաշարի կայուն օգտագործման նպատակով 2025թ սահմանվել է սիգի արդյունագործական որսի 1123 տոննա չափաքանակ, ինչը նախորդ տարվա համեմատ ավելի է 436 տոննայով: Նախարարը հայտնեց, որ փաստացի որսվել է 1103 տոննա, վճարվել է շուրջ 72.5 մլն դրամ բնաօգտագործման վճար, ինչը մոտ 64.4 տոկոսով ավելի է նախորդ տարվա ցուցանիշից:
Վերանայվել են կենդանական աշխարհի օբյեկտների բնօգտագործման վճարի դրույքաչափերը, 2026 թ դրանք բարձրացվել են մոտ 2 անգամ, իսկ սիգի 1 կգ-ի համար՝ մոտ 3 անգամ՝ մինչև 200 դրամ՝ նախկին 65 դրամի փոխարեն: Վճարումն իրականացվում է ոչ թե փաստացի օգտագործման, այլ տրամադրված չափաքանակի հիման վրա:
Թվայնացման, սիգի քվոտայի ավելացման և ապօրինի որսի կրճատման արդյունքում 2025թ կենդանական ռեսուրսների օգտագործումից գեներացվել է շուրջ 134 մլն դրամ՝ նախորդ տարվա համեմատ 24 տոկոսով ավելի:
2025թ գործել է 6 հանրային լողափ: «Նախկինում պատվիրակված 2 պայմանագրեր մենք խզել ենք վարձակալների հետ՝ հաշվի առնելով, որ իրենց կողմից չեն պահպանվել պայմանագրային պայմանները»,-նշեց նախարարը: