1 րոպեի ընթերցում
Ֆրանսահայ երգիչ Հակոբը, որը մշտապես պահում է կապը Հայաստանի հետ, հունվարի 30-ին La Vie en Rose խորագրով համերգով հանդես կգա Գաֆէսճեան արվեստի կենտրոնում։
«Արմենպրես»-ի հաղորդմամբ՝ նա կկատարի ֆրանսիական երգարվեստի ամենահայտնի և ամենասիրված ստեղծագործությունները, երգեր, որոնք միավորում են սերունդներ, մշակույթներ։
Հակոբը ծնվել և մեծացել է Ֆրանսիայում, որտեղ էլ ի հայտ է եկել նրա երաժշտական տաղանդը։ Նրա ուղին կառուցվել է ֆրանսիական երգի, բեմի և կենդանի երաժշտության շուրջ։
Հակոբը լայն ճանաչում է ստացել Prodiges և The Voice France հեռուստածրագրերի շնորհիվ, սակայն նրա կարիերան շարունակվել է հեռուստատեսությունից դուրս՝ աշխարհի տարբեր բեմերում։ Տարիների ընթացքում մասնակցել է բազմաթիվ միջազգային մյուզիքլների և երաժշտական ներկայացումների՝ հանդես գալով Եվրոպայում, Ասիայում և Ամերիկայում։
Նրա կյանքում շրջադարձային է եղել լեգենդար Շառլ Ազնավուրի հետ հանդիպումը։ Այդ հանդիպումը փոխել է նրա կյանքը և վճռորոշ դեր ունեցել Հակոբի համար՝ նրա առաջ բացելով ֆրանսիական շանսոնի և բեմական արվեստի հորիզոնները:
Համավարակի ընթացքում Հակոբը նոր և անկեղծ կապ է հաստատել հանրության հետ՝ երգելով իր պատշգամբից և իր ձայնով աջակցություն ցուցաբերելով բուժաշխատողներին։