2 րոպեի ընթերցում
Հարավաֆրիկյան Հանրապետությունում (ՀԱՀ) տեղատարափ անձրևների առաջացրած հեղեղումներից զոհվածների թիվը հասել է 38-ի: «Արմենպրես»-ի փոխանցմամբ՝ այս մասին հաղորդել է SABC տեղական ռադիոկայանը:
Ըստ ռադիոկայանի տեղեկատվության՝ Մպումալանգայի նահանգում հեղեղման հետևանքով զոհվել է 20 մարդ, հարևան Լիմպոպոյի նահանգում՝ 18: Կան անհետ կորածներ, որոնց թիվը ճշտվում է: Ավելի վաղ հաղորդվել էր 31 զոհի մասին:
ՀԱՀ իշխանությունները հունվարի 18-ին սահմանել են ազգային աղետի ռեժիմ: Երկրի հյուսիսում և արևելքում ջրի մակարդակի բարձրացման հետևանքով վնասվել է ավելի քան 3000 տուն, ավերվել են կամուրջներ, ջրի տակ են անցել ճանապարհներ: Մի շարք շրջաններում պարենի պակաս է զգացվում: Առավել տուժած մարզերի բնակիչներին օգնություն ցույց տալու համար գործի է դրվել բանակը: Տարհանման համար օգտագործվում են ուղղաթիռներ:
Երկարատև տեղատարափ անձրևները Հարավաֆրիկյան Հանրապետությունում սկսվել են 2025 թվականի վերջին, իսկ հունվարի 10-ից դրանք սաստկացել են և առաջացրել բազմաթիվ հեղեղումներ: Օդերևութաբանները զգուշացնում են, որ առաջիկա օրերին անձրևոտ եղանակը կշարունակվի։
Այժմ սաստիկ տեղումներ են ոչ միայն ՀԱՀ-ում, այլև հարևան երկրներում։ Զիմբաբվեում և Մոզամբիկում հեղեղումներն ավելի քան 100 մարդու կյանք են խլել: