Մեծ Բրիտանիան 26,7 միլիոն դոլար կհատկացնի Ուկրաինայի էներգետիկ ենթակառուցվածքի վերանորոգման համար
2 րոպեի ընթերցում
Մեծ Բրիտանիան որպես էներգետիկ օգնություն 20 միլիոն ֆունտ ստեռլինգ (26,7 միլիոն դոլար) կհատկացնի Ուկրաինային: «Արմենպրես»-ի փոխանցմամբ՝ այս մասին հայտարարություն է տարածվել բրիտանական կառավարության կայքում։
Նշվում է, որ Միացյալ Թագավորությունը և Ուկրաինան նշում են 100-ամյա պատմական գործընկերության առաջին տարեդարձը նոր նախաձեռնություններով, որոնք անվտանգություն և բարգավաճում են խթանում երկու երկրներում։
«Հայտարարվում է 20 միլիոն ֆունտ ստեռլինգի նոր աջակցության մասին Ուկրաինայում կենսական էներգետիկ ենթակառուցվածքի վերանորոգման համար, մինչ անմեղ քաղաքացիական անձանց նկատմամբ Ռուսաստանի բարբարոսական հարձակումները սաստկանում են», - նշված է հաղորդագրության մեջ։
Նշվում է, որ «ֆինանսավորումը կապահովի կենսականորեն կարևոր արտակարգ աջակցություն՝ երկրի ողջ տարածքում վերանորոգման, վերականգնման, պաշտպանության և էլեկտրաէներգիայի մշակման համար», որպեսզի տներում, հիվանդանոցներում և դպրոցներում էլեկտրականություն և ջեռուցում լինի ձմեռային ծանր պայմաններում։
Ավելի վաղ Ուկրաինայի նախագահ Վոլոդիմիր Զելենսկին էներգետիկ ոլորտում արտակարգ դրություն էր հայտարարել: Կիևում ստեղծվել է արտակարգ էներգետիկ արձագանքի համակարգման շտաբ: Ըստ Կիևի քաղաքապետի՝ պատերազմի չորս տարվա ընթացքում մայրաքաղաքում էներգետիկայի հետ կապված իրավիճակն այժմ ամենաբարդն է: