Պաշտամունքային որոշ կառույցների օտարումը նախատեսվում է իրականացնել միայն կառավարության համաձայնությամբ
2 րոպեի ընթերցում
Հայաստանի Ազգային ժողովի Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովը քննարկել է օրենքի նախագիծ, որի համաձայն հուշարձանների պետական ցուցակներում ընդգրկված պաշտամունքային կառույցները ցանկացած երրորդ անձի հատուցմամբ կամ անհատույց օտարումը կիրականացվի Հայաստանի Հանրապետության կառավարության համաձայնության դեպքում:
«Արմենպրես»-ի հաղորդմամբ՝ գլխադասային հանձնաժողովի հունվարի 14-ի նիստում «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքում փոփոխություն կատարելու մասին նախագիծը ներկայացրեց նախագծի համահեղինակ, ԱԺ «Քաղաքացիական պայմանագիր» խմբակցության պատգամավոր Թագուհի Ղազարյանը։
Ըստ այդմ՝ հուշարձանների պետական ցուցակներում ներառված պաշտամունքային կառույցի սեփականատերը պարտավոր է սեփականության իրավունքով իրեն պատկանող գույքը ցանկացած երրորդ անձի հատուցմամբ կամ անհատույց օտարելու մտադրության մասին գրավոր ծանուցել Հայաստանի Հանրապետությանը՝ ի դեմս լիազորված մարմնի, իսկ ծանուցմանը կից ներկայացնել գույքի օտարման պայմանագրի նախագիծը և սեփականության իրավունքի մասին վկայող փաստաթղթի պատճենը:
Որպես կարգավորում՝ նախատեսվել է Հայաստանի Հանրապետության իրավունքը՝ համաձայնություն տալու կամ մերժելու գույքային իրավունքները հատուցմամբ կամ անհատույց փոխանցելու գործարքի վերաբերյալ:
Ըստ նախագծի հեղինակների՝ նման կարգավորման միջոցով մի կողմից երաշխավորվել է անշարժ գույքի սեփականատիրոջ՝ գույքն օտարելու իրավունքի իրականացումը, իսկ մյուս կողմից պետության հնարավորությունը՝ համաձայնություն տալու կամ մերժելու գույքն օտարելու գործարքը՝ հաշվի առնելով այդ գույքերի՝ պետության և հասարակության համար մշակութային, հոգևոր-կրոնական, պատմական կամ այլ արժեքավոր նշանակությունը և այլ նպատակներով օգտագործման, տիրապետման դեպքերի հնարավորությունը: