Սեպտեմբերի 19-ին և 20-ին ՄՔԾ 18 ստորաբաժանում կաշխատի՝ ՏԻՄ ընտրությունների թեկնածուներին տեղեկանքներ տրամադրելու համար

ՀՀ ներքին գործերի նախարարության Միգրացիայի և քաղաքացիության ծառայության 18 ստորաբաժանում սեպտեմբերի 19-ին և 20-ին՝ ժամը 09։00-18։00-ն, կսպասարկի առաջիկա տեղական ինքնակառավարման մարմինների ընտրությունների թեկնածուների դիմումները։ Ինչպես հաղորդում է «Արմենպրես»-ը՝ վկայակոչելով ծառայության պաշտոնական հաղորդագրությունը, արտահերթ աշխատանքը կազմակերպվել է 2026 թվականի հոկտեմբերի 25-ին մի շարք համայնքներում կայանալիք ՏԻՄ ընտրությունների թեկնածուներին անհրաժեշտ տեղեկանքների տրամադրումն ապահովելու համար։

Նշված օրերին կաշխատեն ՄՔԾ հետևյալ ստորաբաժանումները՝ Դիլիջանի, Իջևանի, Եղեգնաձորի, Վայքի, Մեղրիի, Գորիսի, Գյումրի 1, Արթիկի, Հրազդանի, Կոտայքի, Աշտարակի, Տաշիրի, Վանաձոր 3, Մարտունու, Գավառի, Արմավիրի, Բաղրամյանի և Վաղարշապատի բաժինները։

Ծառայությունը ընտրելու իրավունք ունեցող քաղաքացիներին հորդորել է նախապես ստուգել իրենց տվյալները և ճշտել ընտրատեղամասը։ Դրա համար անհրաժեշտ է այցելել elections.mia.gov.am կայք և ընտրել «ՏԻՄ ընտրություններ 2026» բաժինը։