ԵՄ-ն աջակցում է Հայաստան-Վրաստան էլեկտրահաղորդման միացվածությանը և Սյունիքի էներգետիկ ու սոցիալական ծրագրերին. Մարագոս
2 րոպեի ընթերցում
Հայաստանում Եվրամիության ծրագրերը ներառում են նաև էներգետիկ ոլորտի առանցքային նախաձեռնություններ՝ ուղղված տարածաշրջանային կապակցվածության և արտահանման հնարավորությունների ընդլայնմանը։
«Արմենպրես»-ի հաղորդմամբ՝ այս մասին «Հայաստանը և խաղաղությունը ռիսկերի ու հնարավորությունների խաչմերուկում» քննարկման ընթացքում հայտարարել է ՀՀ-ում ԵՄ դեսպան Վասիլիս Մարագոսը։
Դեսպանի խոսքով՝ ԵՄ-ի գործողությունները ընթացքի մեջ են Հայաստան-Վրաստան էլեկտրահաղորդման միացվածության ծրագրի շրջանակներում, որը վերաբերում է Հայաստանում էներգետիկ ոլորտում իրականացվող աջակցությանը։
«Սյունիքում իրականացվող նախաձեռնությունների շրջանակում սատարել ենք մի շարք արևային էներգիայի կայանների ենթակառուցվածքների կառուցմանը, ինչպես նաև աջակցություն ենք ցուցաբերել մասնավոր հատվածի ներդրումներին Սևանի Մասրիկ համայնքում»,- ասաց նա։
Մարագոսի խոսքով՝ այս ծրագրերի արդյունքում Հայաստանը կունենա լիարժեք էլեկտրահաղորդման ցանցերի միացվածություն հարևան երկրների հետ, ինչը էապես կխթանի էլեկտրաէներգիայի արտահանման պոտենցիալը։
Դեսպանը նշեց, որ Սյունիքի մարզը ԵՄ-ի համար հանդիսանում է առաջնահերթ ուղղություններից մեկը։
«ԵՄ-ն արդեն ավելի քան 200 միլիոն եվրո է ուղղել Սյունիքին՝ տարբեր ծրագրերի իրականացման շրջանակում»,- ընդգծեց նա։
Մարագոսն այդ համատեքստում նշեց Կապանում բացված «Թումո» կենտրոնը, երկու COAF կենտրոնների բացման վերաբերյալ ստորագրված համաձայնագրերը, ինչպես նաև Գորիսում գործող սոցիալական տաքսի ծառայությունը, որն ապահովում է հաշմանդամություն ունեցող անձանց տեղափոխումը։
Նա ընդգծեց, որ ծրագրերի իրականացման ընթացքում կարևոր է մարդու իրավունքների պաշտպանությունը՝ «ոչ ոք չպետք է անտեսված լինի» սկզբունքով։
ԵՄ դեսպանի խոսքով՝ Եվրամիությունը շարունակելու է համագործակցությունը տեղական և մարզային իշխանությունների հետ՝ ինչպես էներգետիկ, այնպես էլ սոցիալական ոլորտներում ծրագրերի արդյունավետ իրականացման նպատակով։