Թրամփն Ազգային անվտանգության խորհրդի հետ կքննարկի Իրանի նկատմամբ գործողությունների հարցը

ԱՄՆ-ի նախագահ Դոնալդ Թրամփը հունվարի 13-ին խորհրդակցություն կանցկացնի Ազգային անվտանգության խորհրդի անդամների հետ՝ Իրանի նկատմամբ հետագա գործողությունները քննարկելու համար: Ինչպես հաղորդում է «Արմենպրես»-ը, այս մասին հայտնում է CNN-ը։

Հեռուստաալիքի երկու աղբյուրների խոսքով, Թրամփը քննարկում է Իրանի նկատմամբ գործողությունների մի շարք հնարավոր ռազմական տարբերակներ՝ կապված երկրում զանգվածային բողոքի ցույցերի մասնակիցների դեմ իրանական իշխանությունների կողմից ուժի կիրառման հետ։

Սպիտակ տան բարձրաստիճան պաշտոնյան CNN-ին ասել է, որ Թրամփի կողմից քննարկվող տարբերակները չեն ենթադրում զորքերի տեղափոխում Իրան։

Նախորդ օրը Թրամփը Իրանում տեղի ունեցող բողոքների ֆոնին հայտարարել է, որ պատրաստ է աջակցություն ցուցաբերել իրանցի ժողովրդին։ «Իրանը ձգտում է ազատության, հնարավոր է, ինչպես երբեք նախկինում։ ԱՄՆ-ը պատրաստ է օգնել», - գրել էր նա TruthSocial սոցցանցում։

Բողոքի ցույցերն Իրանում սկսվել էին 2025 թ. դեկտեմբերի վերջին իրանական ռիալի կտրուկ արժեզրկման և հիպերինֆլյացիայի պատճառով։ Սկզբում բողոքի ցույցերի հիմնական թեման դարձել են փոխարժեքի կտրուկ տատանումները և դրանց ազդեցությունը մեծածախ ու մանրածախ գների վրա: Սակայն ավելի ուշ Իրանի մի շարք քաղաքներում բողոքի ցույցերը վերածվել են ոստիկանության հետ բախումների, իսկ կարգախոսները ստացել են քաղաքական բնույթ՝ թիրախավորելով Իրանի ներկայիս քաղաքական համակարգը:

Իրանական կողմը ցույցեր հրահրելու մեջ է մեղադրում ԱՄՆ-ին և Իսրայելին։

Իրանի արտաքին գործերի նախարար Աբբաս Արաղչին հունվարի 12-ին հայտարարել է, որ երկրում իրադրությունն ամբողջությամբ վերահսկողության տակ է։