1 րոպեի ընթերցում
Ռուսաստանի նախագահ Վլադիմիր Պուտինն առանձին շփումներ կունենա Եվրասիական տնտեսական միության բարձրագույն խորհրդի նիստի և ԱՊՀ երկրների ղեկավարների ոչ ֆորմալ հանդիպման համար Սանկտ Պետերբուրգ ժամանող բոլոր երկրների ղեկավարների հետ։
«Արմենպրես»-ի փոխանցմամբ՝ այդ մասին ասել է ՌԴ նախագահի մամուլի խոսնակ Դմիտրի Պեսկովը`անդրադառնալով հարցին, թե արդյոք ՌԴ նախագահն առանձին հանդիպումներ կունենա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ։
«Բնականաբար, այդպիսի հանդիպումներ կլինեն, որովհետև երկու օրվա ընթացքում Պուտինն առանձին շփումներ կունենա բոլորի հետ։ Դա պարտադիր է։ Ոչ ֆորմալ շփումների այդպիսի օրերը միշտ ուղեկցվում են ոչ ֆորմալ երկկողմ շփումներով։ Հենց դրանում է այդպիսի ձևաչափի արժեքը»,- ասել է Պեսկովը։
Հիշեցնենք, որ Եվրասիական տնտեսական միության բարձրագույն խորհրդի նիստին և ԱՊՀ երկրների ղեկավարների ոչ ֆորմալ հանդիպմանը մասնակցելու նպատակով Սանկտ Պետերբուրգ է մեկնել նաև Հայաստանի վարչապետ Նիկոլ Փաշինյանը։ Եվրասիական տնտեսական միության բարձրագույն խորհրդի նիստը տեղի կունենա դեկտեմբերի 21-ին, իսկ ԱՊՀ երկրների ղեկավարների ոչ ֆորմալ հանդիպումը՝ դեկտեմբերի 22-ին։