Ուկրաինան Դոնբասը չի ճանաչի ռուսական տարածք ո՛չ դե յուրե, ո՛չ էլ դե ֆակտո․ Զելենսկի

Ուկրաինայի նախագահ Վոլոդիմիր Զելենսկին հայտարարել է, որ Ուկրաինան Դոնբասը չի ճանաչի որպես ռուսական տարածք՝ ո՛չ դե ֆակտո, ո՛չ էլ դե յուրե։ Ինչպես «Արմենպրես»-ը տեղեկանում է «Ուկրաինսկայա Պրավդա»-ից, Զելենսկին այս մասին հայտարարել է լրատվամիջոցների հետ զրույցում։ 

«Ինչ վերաբերում է Ռուսաստանի դիրքորոշմանը, այն դեռ չի փոխվել, դուք գիտեք, որ նրանք ցանկանում են մեր Դոնբասը։ Մեր դիրքորոշումը գործնական է, իրատեսական և արդար. մենք պաշտպանում ենք այն և չենք ցանկանում հանձնել մեր Դոնբասը։ Ամերիկացիները ցանկանում են փոխզիջում գտնել. նրանք առաջարկում են ազատ տնտեսական գոտի։ Ես ևս մեկ անգամ ընդգծում եմ՝ ազատ տնտեսական գոտին չի նշանակում Ռուսաստանի Դաշնության ղեկավարության ներքո»,- նշել է Զելենսկին։

Զելենսկին հավելել է, որ տարածքային հարցը քննարկվում է, բայց Ուկրաինան չի ճանաչի Դոնբասի ժամանակավորապես օկուպացված մասը որպես ռուսական տարածք։

«Մենք ո՛չ դե յուրե, ո՛չ էլ դե ֆակտո չենք ճանաչի Դոնբասը որպես ռուսական տարածք։ Այնուամենայնիվ, մենք կքննարկենք տարածքային հարցը։ Գիտեք, դա առանցքայիններից մեկն է։ Մենք դեռևս կոնսենսուս չունենք»,- նշել է Զելենսկին։

Նշվում է, որ Բեռլինում բանակցությունների ժամանակ ամերիկացի բանակցողներ Սթիվ Ոիթքոֆը և Ջարեդ Քուշները ճնշում են գործադրել Ուկրաինայի ներկայացուցիչների վրա՝ Դոնբասում իրենց վերահսկողության տակ գտնվող հատվածը հանձնելու հարցով։