1 րոպեի ընթերցում
Ֆրանսիայում Հայաստանի Հանրապետության դեսպան Արման Խաչատրյանն ընդունել է ՀՀ Սփյուռքի գործերի գլխավոր հանձնակատարի գրասենյակի «Սփյուռքի երիտասարդ դեսպան» ծրագրի մասնակիցների, ինչպես նաև մի շարք ֆրանսահայ երիտասարդական կազմակերպությունների ներկայացուցիչների։
«Արմենպրես»-ի փոխանցմամբ՝ այս մասին հայտնում են Ֆրանսիայում Հայաստանի դեսպանությունից։
Նշվում է, որ հանդիպման ընթացքում դեսպանը խոսել է ՀՀ արտաքին քաղաքականության առաջնահերթություններից, անդրադարձել է Հայաստան–Ֆրանսիա համագործակցությանը, ինչպես նաև Հայաստան–սփյուռք հարաբերություններին։
Դեսպանության փոխանցմամբ՝ երիտասարդ մասնակիցները ներկայացրել են Ֆրանսիայում Հայաստանի և հայ մշակույթի ճանաչելիության բարձրացման, ինչպես նաև սփյուռքահայ երիտասարդներին համայնքային կյանքում ներգրավման նպատակով իրականացվող իրենց նախաձեռնություններն ու առաջիկա ծրագրերը։
Բացի այդ, հանդիպման ավարտին դեսպան Արման Խաչատրյանը պատասխանել է մասնակիցներին հետաքրքրող հարցերին։