2 րոպեի ընթերցում
Բիշքեկում Հավաքական անվտանգության պայմանագրի կազմակերպության (ՀԱՊԿ) գագաթնաժողովի շրջանակներում Տաջիկստանի Հանրապետության նախագահ Էմոմալի Ռահմոնը Ռուսաստանի Դաշնության նախագահ Վլադիմիր Պուտինի հետ քննարկել է ժամանակակից սպառնալիքների, այդ թվում՝ ահաբեկչության և կիբերհանցագործության դեմ պայքարում համագործակցության ամրապնդումը։ «Արմենպրես»-ի փոխանցմամբ՝ այս մասին հաղորդում է Տաջիկստանի նախագահական գրասենյակի մամուլի ծառայությունը։
«Հանդիպման ընթացքում քննարկվել են երկու երկրների բազմակողմ համագործակցությանը վերաբերող հարցեր։ Գոհունակությամբ նշվել է, որ Տաջիկստանի և Ռուսաստանի միջև ռազմավարական գործընկերության և դաշինքի վրա հիմնված համագործակցությունը կայուն զարգանում է», - նշվում է հաղորդագրության մեջ։
Նախագահները մեծ ուշադրություն են դարձրել ժամանակակից աշխարհի սպառնալիքների և վտանգների դեմ համատեղ պայքարում համագործակցության ամրապնդմանը, այդ թվում՝ ահաբեկչության ու ծայրահեղականության, ինչպես նաև թմրանյութերի ապօրինի շրջանառության և կիբերհանցագործության հետ կապված անդրսահմանային հանցագործությունների մասով։
Հաղորդագրության համաձայն՝ նաև քննարկվել է երկու երկրների միջև առևտրատնտեսական և ներդրումային համագործակցության, ինչպես նաև երկկողմ կապերի ընդլայնման անհրաժեշտությունը։
Շեշտադրվել է կրթության, մշակույթի և այլ մարդասիրական ոլորտներում համագործակցության ամրապնդման կարևորությունը։
«Տեղի է ունեցել նաև մտքերի առարկայական փոխանակում տարածաշրջանային և միջազգային կոնկրետ հարցերի շուրջ», - հավելել է մամուլի ծառայությունը։