Վարչապետը հանձնարարել է ստեղծել երկու աշխատանքային խումբ Երևանում օդի աղտոտվածության և խցանումների խնդիրների լուծման համար
2 րոպեի ընթերցում
File name: B03_2631.NEF
Կառավարության նիստում վարչապետ Նիկոլ Փաշինյանը հայտարարեց, որ անհրաժեշտ է ստեղծել երկու նոր աշխատանքային խումբ Երևանում օդի աղտոտվածության և խցանումների խնդիրների լուծման համար։
«Արմենպրես»-ի հաղորդմամբ՝ վարչապետը նշեց, որ վերջին շրջանում ինչպես համացանցում և մամուլում, այնպես էլ անձնական դիտարկումներով արձանագրել է մի շարք խնդիրներ, որոնք պահանջում են համակարգված մոտեցում։
«Հանգել եմ այն եզրակացության, որ անհրաժեշտ է վարչապետի որոշմամբ երկու աշխատանքային խումբ ստեղծել և վարչապետի աշխատակազմին հանձնարարում եմ անհատական կազմի մասին տալ առաջարկ»,- ասաց վարչապետը։
Նրա խոսքով՝ առաջին աշխատանքային խումբը կզբաղվի օդի աղտոտվածության հարցերով՝ խնդիրը հստակ գրանցելու, պատճառներն ամբողջական գնահատելու և համապատասխան լուծումներ առաջարկելու համար, իսկ երկրորդ խումբը կստանձնի երթևեկության կարգավորման և խցանումների հաղթահարման ուղղությամբ համակարգված աշխատանքները։
Վարչապետ Փաշինյանը կարևորեց նաև հաշվետվողականությունը։
«Այնտեղ պետք է լինեն հաշվետվողականության մեխանիզմներ, որ ժամանակ առ ժամանակ և հանրությանը և ինձ հաշվետու լինեն, թե ինչ աշխատանքներ են կատարված»,-ասաց Փաշինյանը։
Նա ընդգծեց, որ աշխատանքային խմբերը պետք է լինեն միջգերատեսչական՝ ընդգրկելով ոչ միայն պետական կառույցների ներկայացուցիչներին, այլև Երևանի քաղաքապետարանին, համայնքների ներկայացուցիչներին, քաղաքացիական հասարակության և փորձագիտական հանրության անդամներին։