2 րոպեի ընթերցում
Շիրակի մարզում սպանդանոցների բացակայության խնդիրը պետական և համայնքային տարբեր ծրագրերի միջոցով փորձում են լուծել։ Աշոցքում համայնքապատկան մոդուլային սպանդանոցի կառուցման աշխատանքները մոտենում են ավարտին: Աշխատանքներն իրականացվում են լիզինգային եղանակով։
«Մեկ օրում հնարավոր չէ սպանդանոց կառուցել։ Համայնքը համայնքապատկան սպանդանոց կառուցելու համար նախ պետք է կազմի նախագիծ, ստանա գնառաջարկ, այն ներկայացնի ավագանու հաստատմանը, ապա դիմի կառավարությանը՝ լիզինգի գործընթացը հաստատելու և սարքավորումներ ձեռք բերելու համար»,-«Արմենպրես»-ի հետ զրույցում նշել է Շիրակի մարզպետ Դավիթ Առուշանյանը՝ տեղեկացնելով, որ Աշոցքում արդեն ամբողջությամբ ներմուծվել են անհրաժեշտ սարքավորումները, կա հաստատված տարածք, շինարարական աշխատանքներն էլ մոտենում են ավարտին։
Մարզպետի խոսքով՝ Ախուրյան և Արթիկ համայնքները ևս առաջիկայում կլուծեն սպանդանոցի կառուցման հարցը. մարզպետարանում այդ հարցով արդեն ավագանու նիստ են անցկացրել և գնառաջարկներն ուղարկել կառավարություն՝ հաստատման։ Անի համայնքն այս պահին ունի մասնավորի սեփականությունը հանդիսացող, սակայն չշահագործվող սպանդանոց: «Համայնքապետն այժմ փորձում է բանակցել սեփականատիրոջ հետ՝ այն համայնքապատկան դարձնելու կամ վարձակալելու համար։ Միաժամանակ փորձում ենք աջակցել նաև Ամասիայի մասնավոր սպանդանոցին, որը որոշակի փաստաթղթային խնդիր ունի»,-նշեց Դավիթ Առուշանյանը։