368.59
ԵՄ օդային տարածքի խախտումների պատճառով եվրոպական երկրները դժկամությամբ են ՀՕՊ համակարգեր տրամադրում. Զելենսկի
2 րոպեի ընթերցում
Եվրոպական երկրների ղեկավարներն ավելի քիչ պատրաստակամությամբ են սկսել Կիևին հակաօդային պաշտպանության համակարգեր տրամադրել՝ անօդաչու թռչող սարքերի և կործանիչների կողմից ԵՄ երկրների օդային տարածքի խախտումների պատճառով: «Արմենպրես»-ի փոխանցմամբ՝ այս մասին հայտարարել է Ուկրաինայի նախագահ Վոլոդիմիր Զելենսկին Bloomberg-ին տված հարցազրույցում:
Վոլոդիմիր Զելենսկու պնդմամբ՝ դա հոգեբանական ճնշում է, Ռուսաստանը նպատակ ուներ վախեցնել Եվրոպային և հասել է այդ նպատակին:
Աշնան սկզբից ի վեր Եվրոպայի օդային տարածքում հայտնվում են անհայտ անօդաչու թռչող սարքեր։ Մոսկվան հերքում է այս միջադեպերին իր առնչությունը։ Անօդաչու թռչող սարքերի պատճառով եվրոպական օդանավակայանները հաճախ ժամանակավորապես դադարեցնում են աշխատանքը:
Զելենսկին նաև Եվրամիությանը կոչ է արել լուծել ռուսական սառեցված ակտիվների օգտագործման շուրջ տարաձայնությունները, քանի որ նոր միջոցները կենսական նշանակություն ունեն Ռուսաստանի դեմ պատերազմը շարունակելու համար: Նա նշել է, որ Ուկրաինան սկսել է ԱՄՆ-ի հետ համատեղ ԱԹՍ-ներ արտադրել, և որ Կիևին ֆինանսական օգնություն է անհրաժեշտ:
Եվրամիությունը ռուսական սառեցված ակտիվների շուրջ որոշումը հետաձգել է մինչև դեկտեմբեր: Այդ ակտիվների շնորհիվ Ուկրաինային կտրամադրվեր 140 միլիարդ եվրո:
Հարցազրույցում Զելենսկին նաև հայտարարել է, որ Կիևը պատրաստ է բանակցությունների՝ հրադադարի հասնելու համար: Նա համոզմունք է հայտնել, որ ԱՄՆ նախագահ Դոնալդ Թրամփը կարող է ՌԴ նախագահ Վլադիմիր Պուտինին ստիպել նստել բանակցությունների սեղանի շուրջ:
Բաժանորդագրվեք մեր ալիքին Telegram-ում