1 րոպեի ընթերցում
Հանովերի օդանավակայանում թռիչքները նոյեմբերի 5-ի երեկոյան 45 րոպեով դադարեցվել են ՝ օդանավակայանի մոտ անհայտ անօդաչու թռչող սարքի պատճառով: Ինչպես հայտնում է «Արմենպրես»-ը, այս մասին հաղորդել է DPA գործակալությունը՝ վկայակոչելով օդանավակայանի ներկայացուցչին:
Մասնավորապես, գերմանական քաղաքի օդանավակայանը փակվել է ժամը 22:00-ից մինչև 22:45-ը այն բանից հետո, երբ օդանավակայանին մոտեցող օդանավի օդաչուն նկատել է անօդաչու թռչող սարքը և հաղորդել դրա մասին: Նախնական տեղեկությունների համաձայն՝ ԱԹՍ-ն թռել է մոտակա արդյունաբերական գոտու վրայով: Պատահարի պատճառով որոշ ինքնաթիռներ չեն կարողացել վայրէջք կատարել օդանավակայանում, գրանցվել են նաև ուշացումներ:
Այժմ օդանավակայանն այժմ աշխատում է սովորական ռեժիմով:
Նոյեմբերի 2-ին գրեթե մեկ ժամով դադարել էր Բրեմենի օդանավակայանի աշխատանքը՝ կրկին օդանավակայանի մոտակայքում անօդաչու թռչող սարքի հայտնվելու պատճառով: Իսկ հոկտեմբերի 31-ի ԱԹՍ-ի պատճառով երկու ժամով փակվել է Բեռլինի օդանավակայանը: