2025 թվականին 17 հազար 180 անձի շնորհվել է ՀՀ քաղաքացիություն, 3166-ի քաղաքացիությունը դադարեցվել է
1 րոպեի ընթերցում
Հայաստանի Հանրապետության նախագահի հրամանագրով՝ 2025 թվականի առաջին 9 ամիսների ընթացքում 17 հազար 180 անձի շնորհվել է ՀՀ քաղաքացիություն, այս ցուցանիշը նախորդ տարվա նույն ժամանակահատվածում արձանագրված թվի համեմատ 15.5 տոկոսով ավելի է:
«Արմենպրես»-ի փոխանցմամբ՝ այս մասին Ազգային ժողովի մշտական հանձնաժողովների համատեղ նիստում «ՀՀ 2026 թ. պետական բյուջեի մասին» օրենքի նախագծի քննարկման ընթացքում հայտնեց ՀՀ ներքին գործերի նախարար Արփինե Սարգսյանը:
«Դադարեցվել է 3166 անձի քաղաքացիությունը, այստեղ ևս ունենք աճ 10.7 տոկոսով, բայց ընդհանուր համայնապատկերում քաղաքացիություն ստացած անձանց թիվը գերակշռում է»,- ասաց Սարգսյանը:
Նախարարը նշեց՝ 2025 թվականի հոկտեմբերի 30-ի դրությամբ Հայաստանի քաղաքացիություն ստանալու համար դիմում է ներկայացրել Ղարաբաղից բռնի տեղահանված 21 հազար 916 անձ:
«14 հազար 64 անձի շնորհվել է ՀՀ քաղաքացիություն, անձնագրավորման միջոցով քաղաքացիություն ձեռք է բերել նաև 7191 անչափահաս»,- նշեց Արփինե Սարգսյանը:
2025 թվականի ընթացքում անձնագիր է տրամադրվել 312 հազար 177 քաղաքացու: