ՀՀ ԲՏԱ փոխնախարարը հանդիպել է կիբեռանվտանգության ոլորտում մասնագիտացած DTS Solution ընկերության ներկայացուցիչներին
2 րոպեի ընթերցում
Հայաստանի Հանրապետության բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը հոկտեմբերի 24-ին ընդունել է կիբեռանվտանգության ոլորտում մասնագիտացած «ԴիԹիԷս Սըլյուշըն» (DTS Solution) ընկերության համահիմնադիր և գործադիր տնօրեն Վահե Դաղլյանի գլխավորած պատվիրակությանը:
«Արմենպրես»-ի փոխանցմամբ՝ ԲՏԱ նախարարությունից հայտնում են, որ հանդիպման ընթացքում քննարկվել են կիբեռանվտանգության ոլորտում համագործակցության հնարավորությունները, ներդրումային նախաձեռնությունները և Հայաստանի թվային միջավայրի պաշտպանության ամրապնդման ուղիները։
Իր խոսքում նախարարի առաջին տեղակալը ներկայացրել է նախարարության կողմից իրականացվող ռազմավարական ուղղություններն՝ ընդգծելով կիբեռանվտանգության, թվային կառավարման և նորարարական տեխնոլոգիաների զարգացումը՝ որպես երկրի թվային ինքնիշխանության և տեխնոլոգիական անվտանգության հիմնական բաղադրիչներ։
«ԴիԹիԷս Սըլյուշըն» ընկերության համահիմնադիր և գործադիր տնօրեն Վահե Դաղլյանն իր հերթին ներկայացրել է ընկերության գործունեությունն ու փորձառությունը՝ նշելով, որ վերջինս կիբեռանվտանգության ոլորտում մատուցում է միջազգայնորեն լիցենզավորված մի շարք ծառայություններ՝ ներառյալ համակարգերի խոցելիության գնահատում։
Կողմերը կարևորել են փորձի փոխանակումը և մասնագիտական ներուժի համատեղ օգտագործումը՝ Հայաստանի կիբերանվտանգության ոլորտի զարգացման, ինչպես նաև պետական և մասնավոր հատվածներում թվային անվտանգության համակարգերի կատարելագործման ուղղությամբ։
Քննարկումների արդյունքում երկուստեք նախանշել են հնարավոր համագործակցության ուղղությունները՝ ներառյալ ներդրումային ծրագրեր, խորհրդատվական և կրթական նախաձեռնություններ։