Առաջիկայում ակնկալվում են եթովպական բարձր մակարդակի պատվիրակությունների այցեր Հայաստան
3 րոպեի ընթերցում
Ադիս Աբեբայում ՀՀ դեսպանության նոր շենքի տարածքում կայացել է համերգ-ընդունելություն՝ նվիրված ՀՀ անկախության 34-րդ տարեդարձին։
«Արմենպրես»-ի փոխանցմամբ՝ այս մասին հաղորդագրություն է տարածել Եթովպիայում ՀՀ դեսպանությունը։
Բացօթյա համերգին և դրան հաջորդած պաշտոնական ընդունելությանը ներկա են եղել եթովպացի բարձրաստիճան պաշտոնյաներ, Ադիս Աբեբայում հավատարմագրված դեսպաններ, միջազգային կառույցների ղեկավար կազմի, Ադիս Աբեբայի դիվանագիտական կորպուսի այլ ներկայացուցիչներ, քաղաքապետարանի աշխատակիցներ, տեղացի և օտարերկրյա արվեստագետներ, եթովպահայեր և մեծաթիվ այլ հյուրեր: Միջոցառմանը հուշանվերներն են հանձնվել Եթովպիայի ԱԳՆ-ի, Ադիս Աբեբայի քաղաքապետարանի և հայ համայնքի ներկայացուցիչներին։
Համերգով հանդես է եկել եթովպահայ հայտնի երգիչ Վահե Թիլբյանի գլխավորած երաժշտական խումբը՝ հնչեցնելով հայկական, եթովպական ու այլ երգեր: Միաժամանակ դեսպանության շենքում կազմակերպվել է եթովպահայ տաղանդավոր արվեստագետ, նկարչուհի Գոհար Գևորգյանի աշխատանքների ցուցահանդես:
Իր ողջույնի խոսքում Եթովպիայում ՀՀ դեսպան Սահակ Սարգսյանը նշել է, թե չնայած 1991թ. անկախության վերականգնումից ի վեր Հայաստանի առջև ծառացած բազում մարտահրավերներին, ներառյալ՝ ագրեսիային և տնտեսական շրջափակմանը, դարերի ընթացքում ապացուցված բազմաթիվ դժվարությունները հաղթահարելու և վերակառուցելու հետևողական կարողության շնորհիվ հայ ժողովուրդը կրկին ի ցույց է դրել առաջ շարժվելու իր վճռականությունը։
Նա հավելել է, որ Հայաստանը, հավատարիմ լինելով տարածաշրջանում խաղաղության հաստատման իր հանձնառությանը, վճռական է կառուցել ավելի լավ ապագա և ուրվագծել նոր պատմություն՝ իր շուրջը համախմբելով նաև սփյուռքին։
Անդրադառնալով Հայաստանի և Եթովպիայի միջև ամուր պատմական կապերին և օրեցօր խորացող համագործակցությանը՝ դեսպան Սարգսյանը մատնանշել է, որ միայն վերջին ամիսներին Հայաստանից Ադիս Աբեբա է այցելել մի քանի բարձրաստիճան պատվիրակություն։ Ըստ նրա՝ առաջիկայում ակնկալվում են եթովպական բարձր մակարդակի պատվիրակությունների այցեր Հայաստան, այդ թվում՝ հաջորդ տարի Երևանում կայանալիք Կենսաբանական բազմազանության մասին կոնվենցիայի կողմերի 17-րդ համաժողովին մասնակցելու համար: Նա նաև բարձր է գնահատել Աֆրիկյան միության հետ զարգացող կապերն ու գործընկերությունը։
Միջոցառման ավարտին դեսպանության բակում կայացել է պաշտոնական ընդունելություն։