2 րոպեի ընթերցում
Արդեն երկրորդ անգամ Հայաստանում հոկտեմբերի 17-ը նշվում է որպես Ոչ նյութական մշակութային ժառանգության հանրահռչակման միջազգային օր, որի շրջանակներում էլ Գեղարքունիքի մարզի Սևան համայնքում իրականացվել են մի շարք միջոցառումներ:
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, Ոչ նյութական մշակութային ժառանգության օրվան նվիրված միջոցառումները մեկնարկեցին «Սևան համայնքի Ս. Պետրոսյանի անվան թիվ 2 «Զարթոնք» մսուր-մանկապարտեզում: Միջին խմբի սաները դաստիարակ Լիլիթ Մարգարյանի հեղինակած «Սևանի խոսող ձկնիկը» գրքի միջոցով ծանոթացել են Սևանա լճի ծագմանն ու կենդանական աշխարհին:
Միջոցառումը շարունակվել է «Վ․ Ստեփանյանի անվան գրադարանների կենտրոնացված համակարգ» ՀՈԱԿ-ի կենտրոնական գրադարանում, որտեղ կազմակերպվել էր «Պահպանենք ոչ նյութական մշակութային ժառանգության արժեքները» թեմայով զրույց քննարկում՝ մասնակցությամբ Սևանի Վլ. Կարապետյանի անվան թիվ 3 հիմնական դպրոցի աշակերտների: Ցուցադրվել է օրվան համահունչ ֆիլմ, որին հաջորդել են ազգային խաղերի ներկայացումները:
«Սևանի Հովհ․ Այվազովսկու անվան արվեստի դպրոց» ՀՈԱԿ-ում կազմակերպվել է Տառատեսակների ցուցահանդես, որն ուղեկցվել է տառերի և տառատեսակների օգտագործման, դրանց կիրառման վերաբերյալ ճանաչողական տեղեկատվական նյութի տրամադրմամբ:
«Սևանի Վ. Սարգսյանի անվան երաժշտական դպրոց» ՀՈԱԿ-ում կազմակերպվել էր համերգային ծրագիր՝ մասնակցությամբ դպրոցի սաների և դասատուների:
Համերգային ծրագրին ներկա են եղել «Հայաստան» համահայկական հիմնադրամի գործադիր տնօրեն Զարուհի Ազնաուրյանը, հիմնադրամի աշխատակիցներ, Սևանի համայնքապետարանի աշխատակազմի ներկայացուցիչները, ՀՈԱԿ-ների տնօրեններ, աշխատակիցներ, ծնողներ
Ոչ նյութական մշակութային ժառանգության հանրահռչակման միջազգային օրն ամփոփել է «Նկուղ» հարթակում, որտեղ «ՍևանաՑԱՆՑ» ծրագրի շրջանակներում կազմակերպվել է հանդիպում ոլորտի մասնագետների և փորձագետների հետ: