2 րոպեի ընթերցում
Իրանի Իսլամական Հանրապետության և Աֆղանստանի «Թալիբան» շարժման պաշտոնյաները քննարկել են երկու երկրների միջև անվտանգության ոլորտում համագործակցությունը և ընդհանուր սահմանի երկայնքով անվտանգությունն ապահովելու ուղիները։
«Արմենպրես»-ի փոխանցմամբ՝ այս մասին հայտնում է իրանական Mehr գործակալությունը՝ մանրամասներ ներկայացնելով տեղի ունեցած հանդիպումից։
Նշվում է, որ Քաբուլում կայացած հանդիպմանը մասնակցել են Աֆղանստանում Իրանի դեսպան Ալիռեզա Բիկդելին, Իրանի արտաքին գործերի նախարարության Հարավային Ասիայի գլխավոր տնօրեն Մոհամմադ Ռեզա Բահրամին և «Թալիբան» շարժման ներքին գործերի նախարար Սիրաջուդդին Հաքանին։
Բանակցությունները ծավալվել են երկու հարևան երկրների միջև անվտանգության ոլորտում համագործակցության և սահմանային հարցերի շուրջ։ Երկու կողմերն էլ մանրամասն խորհրդակցություններ են անցկացրել թմրանյութերի ապօրինի շրջանառության դեմ պայքարի և ընդհանուր սահմանի երկայնքով համակարգման բարելավման համատեղ ջանքերի վերաբերյալ։
Հաղորդվում է, որ իրանական պատվիրակությունը շեշտել է ընդհանուր սահմանների երկայնքով կայունության պահպանման և փոխըմբռնման ու համագործակցության ոգով խնդիրները լուծելու համար երկխոսության շարունակման կարևորությունը։
Իր հերթին Հաքանին ընդգծել է տարածաշրջանային համագործակցության կարևորությունը՝ նշելով, որ «Թալիբան»-ը ձգտում է բոլոր երկրների, մասնավորապես՝ հարևանների հետ փոխադարձ հարգանքի վրա հիմնված լավ հարաբերությունների։