3 րոպեի ընթերցում
2025 թվականին Շիրակի մարզի վեց համայնք ՀՀ կառավարության հաստատմանն է ներկայացրել 38 սուբվենցիոն ծրագիր՝ 132 ենթածրագրով։ Այս ծրագրերն ուղղված են մարզի համայնքների տնտեսական և սոցիալական ենթակառուցվածքների զարգացմանն ու բարելավմանը։
Ինչպես «Արմենպրես»-ին փոխանցեցին Շիրակի մարզպետի աշխատակազմից, ներկայացված ծրագրերի ընդհանուր արժեքը կազմում է մոտ 11 միլիարդ 933 միլիոն դրամ, որից ՀՀ կառավարության համաֆինանսավորումը կազմում է ավելի քան 6 միլիարդ 401 միլիոն դրամ կամ մոտ 54 տոկոս։ Կառավարության մասնակցությունն այս տարի աճել է ավելի քան 866 միլիոն դրամով։
Գյումրին ներկայացրել է երկու ծրագիր՝ 19 ենթածրագրով, ընդհանուր արժեքը կազմել է շուրջ 2 միլիարդ 400 միլիոն դրամ, կառավարության մասնակցությունը՝ 45 տոկոս։
Ախուրյան համայնքը ներկայացրել է 12 ծրագիր՝ 40 ենթածրագրով, ընդհանուր ծախսը՝ մոտ 3 միլիարդ 785 միլիոն դրամ, կառավարությունն այս նախագծերում համաֆինանսավորում է 53 տոկոսով։
Արթիկ համայնքի ներկայացրած յոթ ծրագիրը՝ 53 ենթածրագրով, կազմել է մոտ 2 միլիարդ 871 միլիոն դրամ, որոնցից կառավարության համաֆինանսավորումը կազմում է 62 տոկոս։
Անի համայնքից ներկայացվել է երկու ծրագիր՝ ութ ենթածրագրով, մոտ 1 միլիարդ 491 միլիոն դրամ ընդհանուր արժեքով։ Կառավարության մասնակցությունն այստեղ կազմում է 49 տոկոս։
Աշոցքից ստացվել է 10 ծրագիր՝ 37 ենթածրագրով։ Ծրագրերի ընդհանուր արժեքը մոտ 942 միլիոն դրամ է, կառավարության աջակցությունը՝ 63 տոկոս։
Ամասիայից ներկայացվել է հինգ ծրագիր՝ ութ ենթածրագրով, ընդհանուր՝ շուրջ 439 միլիոն դրամի չափով, որից կառավարության համաֆինանսավորումը 50 տոկոս է։
Նշված ծրագրերից այս պահի դրությամբ հաստատվել են 18-ը՝ 80 ենթածրագրով, որոնք կազմում են շուրջ 5 միլիարդ 272 միլիոն դրամ։ Ութ ծրագիր հետաձգվել է։
2018-2025 թվականների ընթացքում Շիրակի մարզում իրականացվել է ավելի քան 75 միլիարդ դրամի կապիտալ շինարարություն, որից շուրջ 27 միլիարդ 600 միլիոն դրամը՝ սուբվենցիոն ծրագրերի շրջանակում։