Շիրակի մարզում համայնքների սեփական եկամուտների հավաքագրումը 2025թ․առաջին ինն ամիսներին կազմել է 79,5%
3 րոպեի ընթերցում
Հոկտեմբերի 1-ի դրությամբ ՀՀ Շիրակի մարզի համայնքների բյուջեների սեփական եկամուտների կատարման միջին ցուցանիշը կազմել է 79,5%։ Ինչպես տեղեկացնում է «Արմենպրես»-ը, այս մասին Շիրակի մարզպետարանում կայացած մարզային խորհրդի նիստի ժամանակ հայտնել է Շիրակի մարզպետի աշխատակազմի ֆինանսական վարչության պետ Լիպարիտ Մարտիրոսյանը: Համայնքներից ամենացածր ցուցանիշը գրանցվել է Ախուրյան համայնքում՝ 71,8%։ Գյումրի համայնքը չի ապահովել մարզի միջին ցուցանիշը, սեփական եկամուտները կատարել է 75.3 տոկոս:
Մարզպետ Դավիթ Առուշանյանը եկամուտների հավաքագրման ցուցանիշը ոչ միայն գոհացուցիչ չի համարել, այլև այն գնահատել է որպես մտահոգիչ։ Նրա խոսքով՝ 2025 թվականի տարեկան եկամուտների հավաքագրման ցուցանիշը դեռ կազմում է 56%, ինչն անբավարար է. «Համայնքները պետք է առաջիկա երկուսուկես ամսում հավաքագրեն սեփական եկամուտների մոտ 44 տոկոսը։ Սա նշանակում է ամենօրյա, հետևողական աշխատանք»։
Նա նաև ընդգծել է, որ եկամուտների հավաքագրումը համայնքների ուղիղ պարտականությունն է, իսկ այդ միջոցները համայնքների զարգացման կարևոր նախապայման են։ Մարզպետը համայնքի ղեկավարներին հորդորել է պատասխանատվությամբ մոտենալ հարցին, իսկ բնակիչներին՝ լինել պարտաճանաչ։
Օրակարգային հաջորդ հարցը վերաբերվել է մարզում իրականացվող կապիտալ շինարարությանը։ Քաղաքաշինության, հողաշինության և ենթակառուցվածքների կառավարման վարչության պետի պաշտոնակատար Էմիլ Պետրոսյանը ներկայացրել է, որ Հայաստանի տարածքային զարգացման հիմնադրամի պատվիրատվությամբ մարզում ընթանում են 11 դպրոցի և 2 մանկապարտեզի կառուցման աշխատանքներ՝ ընդհանուր 20 մլրդ 674 մլն դրամ արժողությամբ։
Բացի այդ, ավարտման փուլում են 27 դպրոցի վերանորոգման աշխատանքները՝ շուրջ 6 մլրդ 109 մլն դրամ արժողությամբ։ «Մինչև 2026 թվականը կառուցվող, հիմնանորոգվող կամ վերակառուցվող 500 մանկապարտեզներ» ծրագրի շրջանակում նախատեսվում է վերանորոգել Գյումրու «Լապտերիկ», «Արևիկ» և Անիի Սառնաղբյուր համայնքի մանկապարտեզները։
«Մենք մշտապես լինում ենք շինհրապարակներում։ Որակի առումով անորակ շինարարություն չենք ընդունելու։ Համայնքները պետք է հետևողական լինեն և համագործակցեն մեր աշխատակազմի ու տեսչական մարմինների հետ»,- ընդգծել է մարզպետը։
Նիստի ընթացքում ներկայացվել է նաև սուբվենցիոն ծրագրերի ընթացքը։ Զարգացման ծրագրերի մշակման և իրականացման բաժնի պետ Կարեն Բադիշյանի փոխանցմամբ՝ 2025 թվականին ներկայացվել է 38 ծրագիր՝ 132 ենթածրագրերով, ընդհանուր արժեքը՝ 11 մլրդ 933 մլն դրամ։ Կառավարության համաֆինանսավորման մասնաբաժինը կազմում է 53,6%։ Այս պահի դրությամբ հաստատվել է 18 ծրագիր՝ 80 ենթածրագրերով։