2 րոպեի ընթերցում
Գազայի առողջապահական աղբյուրները հայտնել են, որ սեպտեմբերի 23-ի լուսաբացից ի վեր իսրայելական ուժերի կողմից սպանվել է 26 պաղեստինցի։ «Արմենպրես»-ի փոխանցմամբ՝ այս մասին հայտնում է Al Jazeera-ն։
ՄԱԿ-ի մարդասիրական գործերի համակարգման գրասենյակի (OCHA) խոսնակը հայտարարել է, որ Գազայի հատվածի հարավում տեղահանվածների համար անվտանգ տեղ չկա, և որ օդային հարվածները թիրախավորում են անկլավի բոլոր մասերը։
Գազայի առողջապահության նախարարությունը հայտարարել է, որ վառելիքի պակասի պատճառով հիվանդանոցները փակման եզրին են։ Նախարարությունն ընդգծել է հիվանդանոցներին վառելիք մատակարարելու անհրաժեշտությունն՝ աղետից խուսափելու համար։
Իսրայելի բանակը հաստատել է Գազայի հատվածի հյուսիսում ՀԱՄԱՍ-ի հետ մարտերում իսրայելցի զինվորականի զոհվելու փաստը։
Իսրայելական աղբյուրների փոխանցմամբ՝ Գազայի հատվածում ռազմական գործողությունների մեկնարկից ի վեր զոհվել է 911 իսրայելցի զինվորական։
Տեղեկություններ են հաղորդվում, որ Իսրայելի վարչապետ Բենիամին Նեթանյահուն հրամայել է ամբողջությամբ փակել Արևմտյան ափը Հորդանանի հետ կապող ան-Նաբի կամրջի անցակետը՝ մինչև հետագա ծանուցում։
Ավելի վաղ ՄԱԿ-ի Պաղեստինի փախստականների օգնության և աշխատանքների գործակալությունը (UNRWA) հայտնել էր, որ իսրայելական ուժերը Արևմտյան ափում խստացրել են տեղաշարժի և մուտքի սահմանափակումները։
Գազայի առողջապահության նախարարությունը տեղեկացրել է, որ 2023 թվականի հոկտեմբերի 7-ից վեր իսրայելական հարձակումների հետևանքով զոհված պաղեստինցիների թիվը հասել է 65382 հազարի, վիրավորվել է 166985 մարդ, որոնց թվում զգալի թիվ են կազմում կանայք և երեխաները։
2023 թվականին Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։