2 րոպեի ընթերցում
«Իրական Հայաստան»–ի գաղափարախոսությունը կենարար ու խաղաղարար է դարձել Հայաստանի համար, այդ գաղափարախոսությունն է հնարավոր դարձրել խաղաղությունը:
«Արմենպրես»-ի հաղորդմամբ՝ «Քաղաքացիական պայմանագիր» կուսակցության 7–րդ համաժողովի շրջանակում իր ելույթում այս մասին ասաց ՀՀ վարչապետ, կուսակցության վարչության նախագահ Նիկոլ Փաշինյանը:
Փաշինյանը նշեց, որ 2021–ի արտահերթ խորհրդարանական ընտրություններին ՔՊ–ն նախընտրական պայքարի մեջ է մտել ստանդարտ ռազմահայրենասիրական նախընտրական ծրագրով:
«Բայց նախընտրական քարոզարշվի ընթացքում լսեցինք ժողովրդի խոսնակներին, գերդաստանների մայրերին, հենց նրանց շնորհիվ հաղթեցինք 2021թ ընտրություններում: Բայց նրանք նաև հարստացրին մեր քաղաքական միտքը, նոր քաղաքական ուժ և հայացք տվեցին մեզ և պարտադրեցին փոխել մեր ռազմավարությունը և ընկալումները: Եվ դա, իհարկե, մեկ օրում կամ նույնիսկ 1 տարում տեղի չունեցավ: Դա տեղի ունեցավ երկար ու ձիգ 3 տարիների ընթացքում: Այդ տարիների մտորումների, առերեսումների, հայեցման արդյունքում է, որ ծնվեց «Իրական Հայաստան»–ի գաղափարախոսությունը, որ կենարար ու խաղաղարար դարձավ ՀՀ–ի համար: Այդ գաղափարախոսությունն է հնարավոր դարձրել խաղաղությունը, որը մենք այսօր ունենք»,–ասաց վարչապետը՝ ընդգծելով, որ խաղաղությունն իհարկե երկկողմանի գործընթաց է: