2 րոպեի ընթերցում
Տարվա չոր եղանակով պայմանավորված՝ գյուղացիական տնտեսություններին ոռոգման ջրով ապահովելու համար առաջարկվում է Սևանա լճից նախատեսված 170 մլն խմ ջրառն ավելացնել 30 մլն խմ-ով՝ այսպիսով իրականացնելով 200 մլն խմ ջրառ:
«Արմենպրես»-ի փոխանցմամբ՝«Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին նախագիծն ԱԺ արտահերթ նիստում ներկայացրեց ՀՀ տարածքային կառավարման և ենթակառուցածքների նախարար Դավիթ Խուդաթյանը:
«Նախագծով առաջարկվում է 2025թ-ին Սևանա լճից ոռոգման նպատակով ջրառի չափաքանակը 170 մլն խմ-ից ավելացնել մինչև 200 մլն խմ: Տևական շոգ և չոր եղանակով պայմանավորված՝ Մարմարիկ, Հրազդան, Քասախ և Ազատ գետերում կտրուկ նվազել է ջրի հոսքը, և ջրապահանջը լրացնելու նպատակով ինչպես ջրամբարներից, այնպես էլ Սևանա լճից իրականացվել են պլանավորածից վաղ՝ ջրբացթողումներ նախորդ տարվա համեմատ շուրջ 10 օր»,-ասաց Խուդաթյանը:
Այս տարվա սեպտեմբերի 10-ի դրությամբ հանրապետության համեմատաբար խոշոր ջրամբարների լցվածությունը կազմել է 225 մլն խմ, ինչը 2024թ նույն ժամանակահատվածի համեմատ պակաս է շուրջ 140 մլն խմ-ով:
«Մենք ևս՝ ինչպես բոլորը, մտահոգ ենք Սևանա լճի պահպանության հարցով որպես ռազմավարական ջրային պաշար, սակայն Արարատյան դաշտի ինտենսիվ ոռոգվող հողատարածքներում այլ ջրաղբյուրների բացակայությամբ պայմանավորված՝ անհրաժեշտություն է առաջացել կատարել նշված փոփոխությունը»,-վստահեցրեց նախարարը:
Նախագիծն ԱԺ նիստում քննարկվում է հրատապ ռեժիմով: Առաջին ընթերցմամբ ընդունվելուց հետո երկրորդ ընթերցմամբ քննարկումը կկազմակերպվի 24-ժամյա ռեժիմով: