3 րոպեի ընթերցում
Իրանի նախագահ Մասուդ Փեզեշքիանը դատապարտել է Իսրայելի հարձակումը Կատարի վրա՝ վերահաստատելով Թեհրանի լիակատար աջակցությունն ու համերաշխությունը Կատարին։ «Արմենպրես»-ի փոխանցմամբ՝ այս մասին հայտնում է իրանական Tasnim գործակալությունը։
Կատարի էմիր շեյխ Թամիմ բին Համադ ալ-Թանիի հետ հեռախոսազրույցում Փեզեշքիանը խստորեն դատապարտել է Իսրայելի ագրեսիան Կատարի դեմ և ընդգծել, որ Իրանը ամուր կանգնած է իր կատարցի եղբայրների կողքին՝ պատրաստ ձեռնարկելու ցանկացած անհրաժեշտ միջոց նրանց աջակցելու համար։
Նախագահը հայտարարել է, որ «սիոնիստական ռեժիմն անտեսում է բոլոր ընդունված միջազգային նորմերն ու օրենքները՝ իր գործողություններն իրականացնելով Միացյալ Նահանգների աջակցությամբ»։ Նա շեշտել է, որ սեփական անվտանգությունը պաշտպանելու պատրվակով Իսրայելը սպառնում է ամբողջ տարածաշրջանի կայունությանն ու խաղաղությանը և հանցագործություններ է կատարում առանց որևէ սահմանափակման։
Իրանի նախագահը նաև կոչ է արել իսլամական երկրներին միասնական և համակարգված դիրքորոշում ընդունել՝ դատապարտելու Իսրայելի բացահայտ ագրեսիան թե՛ խոսքով, թե՛ գործով, կանխելու նրա կողմից նման վարքագծի կրկնությունը։
Իր հերթին, Կատարի էմիրը բարձր է գնահատել Իրանի նախագահի կոչը՝ համաձայնելով, որ Իսրայելի վարչապետ Նեթանյահուն գործում է առանց սահմանափակումների և հարձակվում է որտեղ և ինչպես կամենա՝ առանց միջազգային պատասխանատվության։ Նա ընդգծել է տարածաշրջանային երկրների համար Իսրայելի հանցագործությունների դեմ միասնական ճակատ ներկայացնելու անհրաժեշտությունը։
Էմիրը նշել է, որ ՀԱՄԱՍ-ի պաշտոնյաները վերանայում էին ԱՄՆ-ի կողմից առաջարկված հրադադարի ծրագիրը և պատրաստակամություն էին հայտնել դրական արձագանքելու, սակայն Իսրայելն իր հարձակմամբ թիրախավորել է հանդիպումը։
Շեյխ Թամիմը նաև հույս է հայտնել, որ Իրանի և այլ իսլամական երկրների միջև կապը Կատարի հետ կշարունակվի առաջիկա օրերին՝ ընդգծելով տարածաշրջանում Իսրայելի հանցագործությունները դադարեցնելու համար համատեղ ջանքերի կարևորությունը։
Ավելի վաղ Իսրայելի զինված ուժերը հայտարարել են, որ իրականացրել են «ճշգրիտ հարված՝ ուղղված պաղեստինյան շարժման ավագ ղեկավարությանը»։ Հարձակումը դատապարտման է արժանացել ինչպես տարածաշրջանի, այնպես էլ այլ երկրների կողմից։