ԱՄՆ-ն Վենեսուելայի մերձակայքում հարված է հասցրել ենթադրաբար թմրանյութեր տեղափոխող նավի. զոհվել է 11 մարդ
3 րոպեի ընթերցում
ԱՄՆ նախագահ Դոնալդ Թրամփը հայտարարել է, որ զինվորականները հարված են հասցրել Կարիբյան ծովում՝ Վենեսուելայի մերձակայքում գտնվող նավի, որը տեղափոխում էր թմրանյութեր։ Թրամփի խոսքով՝ գործողության արդյունքում սպանվել է 11 «նարկոահաբեկիչ»։ «Արմենպրես»-ի փոխանցմամբ՝ այս մասին նա գրել է իր Truth Social հարթակում։
Թրամփի խոսքով՝ ամերիկյան ռազմական գործողության թիրախում են եղել «նարկոահաբեկիչներ» վենեսուելական «Տրեն դե Արագուա» հանցախմբից, որը ճանաչվել է ահաբեկչական կազմակերպություն։
«Այն գործում է (խմբ.՝ Վենեսուելայի նախագահ) Նիկոլաս Մադուրոյի վերահսկողության ներքո և պատասխանատու է զանգվածային սպանությունների, թմրանյութերի ապօրինի շրջանառության, սեռական թրաֆիքինգի, ինչպես նաև բռնության ու ահաբեկչության գործողությունների համար Միացյալ Նահանգներում և Արևմտյան կիսագնդում: Հարվածը տեղի է ունեցել այն ժամանակ, երբ ահաբեկիչները ծովում էին՝ միջազգային ջրերում, և տեղափոխում էին ապօրինի թմրանյութեր՝ ուղղություն վերցնելով դեպի Միացյալ Նահանգներ: Հարվածի արդյունքում զոհվել է 11 ահաբեկիչ», - գրել է Թրամփը:
Նա նշել է, որ հարվածի ընթացքում ԱՄՆ ոչ մի զինծառայող չի տուժել:
«Խնդրում եմ, թող սա որպես նախազգուշացում ծառայի նրանց համար, ովքեր նույնիսկ մտածում են թմրանյութեր ներմուծել Միացյալ Նահանգներ», - հավելել է Սպիտակ տան ղեկավարը:
Վերջին շաբաթներին Թրամփի վարչակազմն ուժեղացրել է ռազմական և քաղաքական ճնշումը Վենեսուելայի նախագահ Նիկոլաս Մադուրոյի նկատմամբ։ Մադուրոյի ձերբակալությանը հանգեցնող տեղեկատվության համար Վաշինգտոնը նշանակել է 50 միլիոն դոլար պարգև։
Վերջին երկու ամիսներին ԱՄՆ-ն նաև ուժեր է կենտրոնացրել Կարիբյան ծովի հարավում, այդ թվում՝ նավեր և ռազմածովային ուժերի հազարավոր զինծառայողների։ Վենեսուելան արձագանքել է ամերիկյան ուժերի տեղակայմանը։ Մադուրոն նշել է, որ «առավելագույն ռազմական ճնշման պայմաններում Վենեսուելայում հայտարարվել է պաշտպանության առավելագույն պատրաստվածության մակարդակ»։